عزیز اوخوجولار، فولکلور توپلاما ایشی زامان، امکانات و یاردیم ایسته ییر. دئمک هر باخیمدان دؤولتی بیر قوروم آرخادا دورماسا بیر شخص واسطه سیله بو ایشین گؤرولمه سی ایمکانسیز اولماسادا چوخ چتین اولار اما اولو تانریا شوکور اولسون کی سککیز ایل آردیجیل و دایانماز چالیشمادان سونرا «اورمو فولکلورو» کیتابی ایشیق اوزو گؤردو. بو مجموعه نی اوخویان هر بیر شخص، بوردا گؤردویو و یا باشقا بیلدیی قونولار اوزره، اوزاقلارا اَلی چاتمازسا دا، اؤز اطرافیندا اولان بیلگینی امکانی قدر توپلاسا، اؤز فرهنگ و هویتینه اولان بورجوندان اؤده میش اولار. اورمو بؤلگه سینین بؤیوکلویو، اسکی لیی، اورادا یاشان طایفالارین چئشیدلیلیی، اورمونون مدنیت اوجاغی اولماغی و هر ماحالین قونشو ماحال ایله فرقلی لهجه لری و ... فولکلور پتانسیللرینین، واریانت باخیمیندان، چوخ یوکسک اولدوغونون گؤسترمکده دیر. بو کیتابدا اورمو فولکلورونون چئشیتلی قوللارینا، او جمله دن: توی، یاس و دوغوم دبلری، موسیم و معیشتله باغلی عنعنه لر، خالق طبابتی، پئشه لر، تاریخی افسانه و روایتلر، اورمونون گوجلو عاشیق مکتبی و اشاره اولوبدور.