کؤچورن: فرخ جرایدی

من دئدیم :

- ائله ایسه سیزین ایراندا کی گزمه‌گینیز نه کیمی بیر اؤنه‌می اوْلا بیلر؟

- بوُ گزمه‌گین هم ایران، همده آمریکا اۆچۆن بؤیوک اؤنه‌می واردیر. من سیزه اؤنجه بیز سیاسی مساله‌لردن اوُزاقداییق، دئمیشدیم ایندی ایسه اؤزوموز ده حس ائتمه‌دن دانیْشیقلاریمیز اینجه یئرلره وارمیشدیر.

- منجه بوُرادا هئچ بیر سیاسی مساله یوْخدور. بوُرادا یالنیز ایستی بیر دانیْشیق واردیر. چۆنکو بوُرا نه اوْتوروم دور نه ده میتینگ دیر .»
قیْز گۆله‌رک:

- سیز بوُنو صمیمی سؤیله‌دیگینیز کیمی، صمیمیت-ه ده اینانیرسینیز؟

- بوُنا وجدانیملا سؤز وئریرم. بوُ تانیْشلیق دوام ائتدیکجه صمیمیتیمیز ده یۆکسله‌جک و محکم اوْلاجاقدیر.

قیْز بیراز دۆشونه‌رک دئدی:

- ایستر آمریکا، ایستر آلمانیا حکومتلرینین ایرانداکی چالیشمالاریندا ایلکینلر اۆچۆن دیْش، ایران اۆچۆن ایسه ایچه‌ری منفعت-ی واردیر. آلمانیا ایراندا روُس منافعلرینین قارشی‌سیندا دوُرور، اوْ روُسیه نین ایراندا آلماق ایسته‌دیگی بیر چوْخ امتیازلارا مشتری چیْخیر، سوْنوجدا ایران روُسیه‌یه امتیاز وئریرسه ده، ساده‌جه اؤزو اۆچۆن اَل‌وئریشلی بیر حالدا وئره بیلر، چۆنکو روُسیه اؤز قارشی‌سیندا آلمانیا کیمی رقیب گؤردوگوندن، یاواشجا کئچمه‌گه مجبور اوْلور. بوُنونلا دا ایرانین بوْینونا کئچیریلن بوْیوندوروغونون آغیْرلیغی بیراز آزالمیش اوْلور.

آمریکالی‌لار دا سیزین اؤلکه‌نیز اۆچۆن ضررلی دئییلدیلر. ایستر آلمانیا ایستر آمریکا و بوُنلارین هر ایکیسی ایرانین حاکم‌لری کسیلن انگلیس و روُسیه دن بیر شئی قوْپارماق و اؤز منفعتلرینه قارشی کئچمه‌گه مجبور ائتمک سیاستینی داشییرلار کی بوُدا بیر چوْخ حاللاردا ایران اۆچۆن فایدالی دیر.

- بوُنلار دا عینی سۆمۆرگنچیلردن دیلر,- دئیه سؤزونو کسدیم.

- دوْغرودور ، لاکن آلمان ، آمریکا کاپیتالیست‌لری سۆمۆرگنچی اوْلسالاردا روُس لار و انگلیس لر کیمی طاماح‌چیل دئییلدیلر. آلمانیانین تۆرکیه ده آپاردیغی جهانگیرلیک سیاستی ده دوْغو دا انگلیس آغالیغینی سیْندیرماق اۆچۆن دور. آلمانیایا بغداد دمیریوْلو لازم‌دیر، چۆنکۆ آلمانیا، روُسیه و افغانستاندان کئچیب هندوستانا گیره بیلمه‌یه‌جکدیر. اوْنا بغداد دمیریوْلو داها اَل‌وئریشلی دیر. بوُ دمیریوْل واسطه‌سیله آلمانیا اوْردولاری هئچ بیر تلفات وئرمه‌دن هندوستان قاپیلارینی دؤیه‌جکلر.

قیْز سؤزونو بیتیریب سس‌سیزلیگه دالمیْشدی، ایندی اوْ مندن جواب گؤزله‌ییردی. من ایسه اوُزون جواب وئره بیلمه‌یه‌جکدیم، چۆنکو شجاع کندینه یاخیْنلاشیردیق.

- ائله‌دیر خانیْم قیْز، لاکن آلمانیا، تۆرکیه واسطه‌سیله هندوستان-ا گئدرکن تۆرکیه‌نین نه دوُرومدا قالاجاغینی دا دۆشونمه‌لییک، ناپلون آلمانیادان کئچیب روُسیه گئتدیگی وقت آلمانیا نه دوُرومدا قالمیشدیسا، آلمانیا تۆرکیه‌دن کئچیب هندوستان-ا گئتدیگی زمان دا تۆرکیه همان دوُرومدا قالاجاقدیر.

قاباقدان دؤرد نفر آتلی گلیردی . دانیْشیغی کسدیک. آتلی‌لار گلیب یئتیشدی، علی اکبر یوْلداش اؤز عمی‌سی اوْغلانلاری ایله بیزی قارشیلاماغا گلمیشدی.

شجاع کندینه گیردیک. علی اکبر یوْلداشین ایکی قاتلی ائوی اؤنونده فایتوْنلاردان ائندیک. هاوا سرین ایدی، اینجه بیر یئل اسیردی. اَل-اۆزۆمۆزو یوُدوقدان سوْنرا گئت-گئده جوُلفانین ایستی‌سینی اوُنوتماغا باشلادیق.