Axar.az
یوخاری
19 آوقوست 2019


دومانلی تبریز ۱۴۸-اینجی بؤلوم

آنا صحیفه کولت
12 Punto 14 Punto 16 Punto 18 Punto

کؤچورن: فرخ جرایدی

" پایان کَندی "

سحر چای ایچرکن قاپی وورولدو، بیرازدان سونرا حسینعلی عمی بیر مکتوب گتیردی. مکتوبو میس هاننا یازمیشدی. مکتوبدا یئنی ائوه کؤچدوگونو و بوگۆن پایان کَندینه گئده‌جه‌گینی یازمیش، مکتوب گتیرن اوشاق واسطه‌سیله اونونلا گؤروشمه‌یی ایسته‌میش.

" گئت خبر وئر منی گؤزله‌سین! "دئیه چاییمی ایچیب قالخدیم و گئتمه‌یه حاضرلاشدیم.

من اؤزوم ده بو کند ایله چوخ ماراقلانیردیم، اؤزل‌لیک‌له سلاح‌لارین هارادا گیزلندیگینی بیلمک ایسته‌ییردیم. حسینعلی عمی‌یه بعضی تاپشیریقلار وئردیم و ناهارا گله‌جه‌گیمی ده مشدی کاظم آغایا سؤیله‌مه‌سینی تاپشیریب ائودن چیخدیم.

میس هاننا یول پالتارلارینی گئییب منی گؤزله‌مکده ایدی. او منی گؤرر-گؤرمز:

- چای ایچدینیزمی؟ -دئیه سوروشدو.
- ایچمیشم.

- کیمله ایچدینیز؟

- حسینعلی عمی ایله.

- بوندان سونرا چایی دا یئمه‌گی ده بیر یئرده یئییب ایچمه‌لیییک. اوتاقلار سربست اوتاقلاردیر، بورادا یاشایا دا بیلرسیز.

- خیر، سیزی ناراحت ائتمه‌یه جسارت ائتمه‌رم. منیم یانیما گلیب-گئدن چوخ اولور.

- اولسون، منه اذیّتی یوخدور. اوتاقلارین ایکیسینی سیزین یانیزا گلنلر اۆچون حاضرله‌مک ممکن‌دور.

او، منی ائوده گزدیریب بیر-بیر اوتاقلارینی گؤسترمه‌یه باشلادی. دؤرد اوتاقدان یالنیز ایکیسی دؤشنمیش ایدی.

میس هاننا اوتاقلاری دوغو اوتاقلارینا بنزتمک ایسته‌میشدیسه ده باشار بیلمه‌میشدی. لاکن بوراسی بیر آوروپالی ائوی ده دئییلدی. چۆنکو یئره قالی‌لار دؤشنمیشدی. ائوینده یاشلی بیر آمریکالی قادین، بیر ده اون بئش یاشلاریندا تبریزلی بیر اوغلان اوشاغی قوللوقچو ساخلامیشدی.

میس هاننا الیمدن توتوب آمریکالی قادینا انگلیسجه نه ایسه سؤیله‌دی، قادین باشی ایله سلام وئردی.

بیز قاییدیب بالکن-ا چیخدیقدا میس هاننا اوّل‌کی سؤزونو تکرار ائتدی:

- سیزین راحتینیزی تامین ائده‌جه‌یم، بورا کؤچمه‌یه سؤز وئرمه‌لی‌سینیز.

من بو سؤزون جوابینی وئرمه‌دن قوللوقچو اوغلان گلیب فایتونون حاضر اولدوغو خبرینی وئردی.

دیْشاری چیخدیق، فایتونوموز تبریزین قوزئی دوغوسونا دوغرو ایره‌لی‌له‌مه‌یه باشلادی. یولوموز باقرخانین سنگرلری‌نین یانیندان ایدی، داغیدیلمیش سنگرلرین یئرینده روس قوروقچو پُست‌لاری قورولموشدو.

تبریز کۆچه‌لرینده ائششک حرکتی اوّلکی کیمی ایدی. باغلار زیبیل و پئیین، حماملاردان کۆل، باغلاردان قاییداندا میوه، گؤی، قوْوون، قارپیز، اۆزوم داشییان اوُزون قولاقلار کاروانلارینی یاریب کئچمه‌یه مجبور اولان فایاونوموز چوخ یاواش گئدیردی.

مینیک ائششکلری‌نین ده ساییسی یوخ ایدی. دکانلار آچیلان وقت اولدوغوندان، قولاقلارینی ساللایاراق تبریزین دوغوسوندان باتی‌سینا، قوزئی‌دن گۆنئیه دوغرو حرکت ائدن آغ ائششکلر غریب بیر منظره تشکیل ائدیردی.

تاپاقچیلار یئنه‌ده ایکی پوتلوق ( ۳۲ کیلولوق) تاباغی باشینا قویوب سسله‌مکده ایدیلر:

- گل تَبرزه‌دو، عسکری‌دو، آغامالیدو، ارباب مالیدو ...

اۆزو اؤرتوکلو و اؤرتوکسوز قادینلاردا عادتلری اۆزره باشلاریندا بؤیئک بیر باغلاما اویان-بویانا گئتمکده ایدیلر. قارپیزتَزه‌جه چیخمیشدی. یولوموز قارپیزچی دکانلاری‌نین یانیندان ایدی. بورادا باقرخانین سون سنگری اولان کۆچه‌لردن بیری ایدی. کئچدیگیمیز یئرده چوخ آدام ییغیشمشدی. بورادا قوروقچو پُست-و اولدوغوندان بیر اولای اۆز وئردیگینی ظن ائتدیک. فایتونو ساخلاتدیردیم.

تاریخ
2019.07.16 / 10:55
مولف
آیتاج آراز
شرح لر
دیگر خبرلر

خوی شهرین‌ده «شمس و مولانا» فستیوالی کئچیریل‌دی

کودتای 28مرداد نعشی که همچنان روی دست ما و دل ماست!

هشدار و هشدار

دو هفته پیش حسن روحانی در جریان سفر به تبریز از بزرگترین فرش دستبافت جهان رونمایی کرد

چکیده‌ای از کتاب دومانلی تبریز (تبریز مه آلود)

سلجوقلارین مشهور شاه‌زاده‌سینین قبری تاپیلدی

تورک مطبخینین سورپریزلری

تبریزده یاقوبزادنین کیتابلارینین تقدیماتی کئچیریل‌دی

آنتالیا دا قیزیل پورتاغال فیلم فستیوالی کئچیریله‌جک

خالق آرتیستی موسلوم ماقومایئوین دوغوم گونودور

خبر خطّی
 
Axar.az'da reklam Bağla
Reklam
Bize yazin Bağla