کؤچورن: فرخ جرایدی

بیزی توتونچو اوغلو ایله حسن آغا قارشیلادی. فایتوندان دۆشوب چادیرلارا گیردیک. بیرینجی چادیر دفترخاناچیلارین ایدی، بورادا جمعیتین حق-حساب ایشلری آپاریلیردی. ایکینجی چادیردا بیر قادین حکیمی اؤتورموشدو. بو قادین اوشاقلاری قبول و معاینه ائدیر، ساغلاملاری اوشاق ائوینه، خسته‌لری ایسه معالجه چادیرینا گؤنده‌ریردی. اۆچونجو چادیر " تداوی " چادیری ایدی. بورادا ۲۸ نفر خسته اوشاق وار ایدی. دؤردونجو چادیر ساغلام اوشاقلارین چادیری ایدی، بورادا اللی‌یه قدر اوشاق یئرلشمیشدی. هر شئی ساده و اوُجوز باشا گتیریلسه‌ده، تمیزلیک یۆکسک بیر درجه‌ده ایدی.جمعیتین بۆتون دولاندیرانلاری آلتی نفر قادین، دؤردجه کیشی‌دن عبارت ایدی. بیر حکیم، بیر حکیم یاردیمجیسی دا آرتیلدیقدا بۆتون جمعیت‌ده ۱۲ نفر وار ایدی.

" آمریکا یاردیم جمعیت‌لری، بو موسسه‌لری آچماقلا بشریّته یاردیم وئرمکدن علاوه بیر مقصد ده داشییرمی؟ " دئیه میس هاننادان سوروشدوم.

میس الینده‌کی مداد لا بالاجا دفترینی، ال چانتاسینا قویاراق:

" ایش بئله‌دیر، اساس مقصد بشریّته یاردیمدان عبارت‌دیر. بو اوُشاقلار تربیت ائدیله‌جک، یعنی اؤزلجه‌سینه بؤلونه‌جک، اؤزل مکتب‌لرینی بیتیردیکدن سونرا جمعیتین اؤزونه اؤزل ایش یئرلرینده چالیشاجاقلار، امک حق‌لری‌نین بیر پارچاسی کؤرپه‌لیکدن موسسه‌ده چالیشماغا گیرنه قدر اۆزرلرینه قویولان خرجی اؤده‌مک اۆچون گؤتوروله‌جکدیر.

قازانجلاری‌نین بیر پارچاسی ایسه ایشله‌دیگی زمانلارداکی خرجلرینه گؤتوروله‌جک. بیر پارچاسی جمعیتین گۆونلیک بؤلومونه وئریله‌جک. بورادا توپلانانلارلا جمعیت اؤز ایش آلانینی گئنیشلندیره‌جک. " دئدی.

" اوشاقلار همیشه‌لیک‌می جمعیتین اختیاریندا قالاجاقلار؟ "

" خیر "دئیه قیز تله‌سیک جواب وئردی " هر بیر کؤرپه‌یه قویولان خرجلر دفترلره یازیلیر، دفترین بیری جمعیتده قالیر، بیر اۆزو ایسه جمعیته گیرن اوشاغا وئریلیر و اونا قویولان خرج حسابینا قازانجیندان چیخیلان پارالار همان دفترلرده یازیلیر. خرجلر تمامیله اؤده‌نیلدیکدن سونرا اوشاق آزاددیر. آرتیق او جمعیتین موسسه‌سیندن چیخیب باشقا یئرده ده ایشله‌یه بیلر. "

" اوشاق جمعیته بوراخیلمادان، اوشاق یییه‌سی بۆتون خرجلری جمعیته قایتارارسا اوشاغینی آلا بیلرمی؟ "

" خیر، آلا بیلمز. بئله ایش هئچ وقت اولمامیشدیر. اولسادا اوشاق یییه‌سی ایله جمعیت آراسیندا باغلانمیش سؤزلشمه بونا یول وئرمز. "