آنا صحیفه کولت |
کولت. آذ آذربایجانین گؤرکهملی یازیچیسی فرمان کریمزادنین " تبریز ناموسو" آدلی تاریخی رومانینی تقدیم ائدیر:
کؤچورن آینوره مممدووا
آلان- قوا اونون آروادی اولارسا، او طایفانین تام حقوقلو باشچیسی ساییلاجاق. بو ایشده آلان-قوانین دا راضیلیغی لازیم ایدی. اصلینده طایفانین باشچیسی حاضیردا او ایدی. اریندن سونرا حاکمیت اوغلونا کئچیردی. اوشاق کورپه ایدی، اونا گوره آناسی حاکم اولوردو.
یئکه نیدون آلاچیغا چاتیب، بیر آیاغینی یئره قویوب، او بیری آیاغینی دا هرله ییب، بوراخدی و سوروشدو:
بو نه دی؟
چوماغینا سویکه نن آق ساققال بیر کیشی بارماغینی دوداغینا آپاردی. یعنی سوس، قوی شامانین صحبتینه قولاق آساق.
آلاچیغین قاپیسی آچیق ایدی. نئچه نفر ده دوزمه ییب، ایچری گیرمیش، آغینا- بوزونا باخمادان آغ و قارا کئچه لرین اوسونده دیز اوسته چوکموشدولر.
شامان اوخویوردو...
یوز، یوز ایللر بوندان اول، ائلیمیزین، گونوموزون سحر واختی ایدی. ائللردن بیر گوزلینین اوز گوزل، بختی کور ایدی. تانری اونو قسیر قویوب، وئرمه میشدی اولاد پایی. ار ایگیدی ایگیدلرین یاراشیغی، نذر وئریر، پارا پایلاییر، شامانلاردان ایسته ییردییی گوزلری کور، اوزو ده شیل بیر اوشاق. تانری الی وئرن اولار، تانری الی وئرمز اولار... بیر گون ایگید آتیب گئتدییی بو گوزلی. آیری گوزل اولدو اونون جان سرداشی...
او گناهسیز گوزل ایسه باش گوتوروب گئتدی ائلدن. صحرالاردا، داغدا، داشدا دوشدو دیلدن. بیر گون ائله یاغیش یاغدی، بیر گون ائله طوفان قوپدو... داغیدیردی یئری- گویو. گوزل ایسه اومودلا گلدی بیر پالیدین کوغوشونا. قوجا پالید او بختسیز بالا کیمی عزیلییب، آلدی آنا آغوشونا.
انسانلارین فریادلاری، شامانلارین ندالاری گئدیب چاتدی تانریلارا. بویوک تانری گنج اوغلونو گوندردی کی، گورسون یئرده بنده لری سلامتمی؟.. جوان تانری دوندو ایتی ایلدیریما. شاققیلداییب، گورولداییب، یئر اوزونه ایشیق ساچدی. بیردن پالید کوغوشوندا قرار توتان او گوزلی گوروب چاشدی. گنج تانری دا محبتین اسیری یدی. اونون بو ایش، بو عملی بلکه ائله گوی اوزونده اونون بیرجه کسیری ایدی.
تانری سئودی گوزلی... طوفانی دا، یاغیشی دا رام ائله دی. اوز نورونو کوغوشا نشان وئردی. تانری سئون گوزلین چاخان نوردان اوغلو اولدو، واخت چاتاندا. هر بدبختده خوشبخت اولور واخت چاتاندا.
دوز اون دوققوز اوغلو اولدو، جعمی گوزل، جعمی ایگید. او طایفانین آدی دا وار، سانی دا وار. اولمه یه جک نه قدر کی، گوی اوزونده قرار توتوب او تانریلار! کیمدیر اونلار؟ دئییم بیلین. دوققوز اوغوز، اون اویغوردو او طایفانین گوزل آدی...
آلان-قوانین کنیزی چیچه یین چیچه یی چاتلادی. سئویندیییندن نه ائله دییینی بیلمه دی. ایمکلییب شامانین اته ییندن اوپدو
آلان قوا آیاق اوستونده، ماوی گوزلر رنگینده کی لیباسیندا ملک کیمی دایانمیشدی. گوزللیکده ائله بیل هامییا مئیدان اوخویوردو. شامان ایسه قوپوزو چالیردی. اونون هله دئمه یه سوزو واردی.
ائی منیم خوشبخت ائلیم! ائشیت و بیل: بیزیم طایفایا دا بئله بیر خوشبختلیک نصیب اولموشدور. بویوک ایگید دوبون- بیانین دول قالمیش خاتونو آلان- قوانی دا تانریلار نشانلامیشلار. هر ئجه اونون چادیرینین باجاسیندان دوشن نورو کیم گورسه، او، بونون گویلر قدر حقیقت اولدوغونو یقین ائدر. چیچک قیشقیردی:
من گورموشم.
داوامی وار
تاریخ
2020.02.05 / 18:12
|
مولف
فرمان کریمزاده
|