کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

"من گورموشم" دئیین بیر نئچه سس ده ائشیدیلدی. همین گون شامانین دا، خاتونون دا نفوزو اوزلرینه قاییتدی. اما شامان بو ایشیق، شعاع، نور صحبتینه اینانمیردی. قلبینین درینلییینده بونا شپهه ایله باخیردی. قونشو تورک طایفالاریندا دانیشیلان بئله افسانه ائشیتمیشدی. اونلاردا وارسا، بونلاردا دا اولمالیدی. اونا گوره ده آداملاری ایناندیردی. اوزو نئجه؟

شامان تانریلیغینن سرلرینی بیلیردی. گویده تانریلار یاشاییر و اونلارین یئره ائندیکلری مسکن خان طانری داغیدیر. اونلارین وارلیغینی آداملارا تانیتدیران یاغیشدی، قاردی، ایلدیریمدی، شیمشکدی. تانری انسانلاری سئونده یازدا اونلارین اوتلاقلارینا یاغیش، غضبلننده دولو گوندریر و ایلدیریم قیلینجینی اونلارین باشیندا سیناییر. بونلاری هامی بیلیر. آما انسانلاریرتانریلارین وارلیغینا ایناندیرماق اوچون شاماندان بویوک مودریکلیک، عاغیل، انسانلارین خیرینه دئییلمیش مصلحتلر، دوز یول، خوش سوزلر گوزلنیلیر. بو شامان بابانین گوجو ایسه قوپوز و سوزده ایدی. قوجالیغیندان شامان رقصینی ده آرتیق ایت ایلیندن بری اوینایا بیلمیردی. بئلینده کی و دیزلرینده کی آغری امکان وئرمیردی. اونون اولاد ساندان، قوهوم سانندان هئچ کسی ده یوخ ایدی. سودونو، آتینی ائل وئریر، اوجاقدا یاندیرماغا اودونو، چیرپی نی، گرمه نی ده آداملار گتیریردی. اوجاغا آتیببب، آلووو قیزیشدیردیغینی باریتی ایسه نه واختسا چیندن گتیرمیشدیلر. او، باریتی کیچیک بیر توربادا بوینوندان آسیب ساخلاییر، سرینی هئچ کسه وئرمیردی. او گوگوردون ده سرینی بیلیردی. بو سر- اونسوز دا کوچری حیواندارلارا لازیم دا دئییلدی. سری بیلسه لر، ایناملاری دا ایتردی.

اما شامان بیرشئیه اینانیردی کی، ائلینه، اوباسینا صداقتلیدیر. اونا دوز مصلحتلر وئرر، آیری یوللاردان قایتاریر، یاواش-یاواشپیس عادتلردن خلاص ائدیر.

ایندی بو ایشیق، شعاع، نور مسئله سینده او اوز فیکیرلرینی داها ایناملا تلقین ائده بیلر، البته، سونرا یالانا چئوریلمه سه. آلان-قوا دوغمالیدیر. اگر تانری ایله نکاحلانیبسا، دئمک، او دونیایا اوشاق گتیرمه لیدیر. بونون آیری بیر یولو یوخدور. عکس تقدیرده خاتون دا، شامان دامحو اولار، انسانلار اینامینی ایتیرر، طایفا باشقا چوللرین قوزغونلارینا یئم اولار. او، چوخ یاخشی بیلیردی کی، گونشین ایشیغی اولماسا، بیر اوت بئله جوجرمز. گونشین ایشیغی اولماسا بئله، اوتو بیتیره جک توخوم، کوک یوخسا، او بیتمه یه جک. بونلار بیر- بیریندن آیریلمازدیر. بو باره ده خاطونلا مطلق دانیشمالیدیر.

یئکه نیدون ایره لی گلیب دئدی:

ائی بویوک شامان، من بو ایشه اینانا بیلمیرم.

اولادیم، تانریلارا اینانمیرسانمی؟

تانریلارا اینانماسام، منی ایلدیریم وورار، سئل آپارار، باشیما مین بلا گلر.

اوندا تانریلارین نورونا دا اینانمالیسان! اگر تانری نورونو بیزیم طایفامیزین اوستوندن اسکیک ائتمه ییبسه، اوندا بیز اونون ان خوشبختلریییک. سن اوزون ده یاخشی بیل کی، آلان- قوانی یالنیز تانری سئوه بیلردی. بو ائللرین آراسیندا بئله بیر گوزل قیز، گلین گورموسنمی؟

یوخ، گورمه میشم.

دئمک، اونون اوزونو ده تانری نورو یارادیب! اوز یاراتدیغینی اوزونه قییماماق انسان گوجوندن کناردا اولان بیر شئی دئییلمی؟
بلی!

اوندا گئدین، هامینیز قربان کسین! اونو دا دئییم کی، تانری نورو بیر دفعه گوزه گورونر. هر گئجه او چادیرا باخماقلا او نورو گورمک اولماز، داها پیس، بئله لیکله سیز تانرینی حیرصلندیره بیلیرسینیز. اونون غضبینه گلمکدن قورخون!

داوامی وار