کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

شامان قوپوزونو چالماغا باشلادی. آلان- قوا آییلیب، اوزو شامانین اوجاغینا چیرپی قویدو و جیبیندن چیخارتدیغی بیر نئچه قیزیل پولو دا اونون یانینداکی میس جاما آتدی. سونرا دوندو، شاهانه گورکمله چیخیب، اوز آلاچیغینا طرف گئتدی.

هامی گئتسه ده، یئکه نیدون گئتمه دی. اوجاغین کناریندا اوتوردو.

شامان بابا، - او، اوزونو ایتیرمیشدی و اونا هردن بیر جور مراجعت ائدردی:- تانری دا ائولنرمی؟

بلی. بس انسانلارین آراسینداکی نکاح عادتینی کیم قویوب؟ البته، تانریلار! اونلارین دا اوز قانونلاری وار، اونو درک ائتمه یه بیزیم عقلیمیز چاتماز. دئمک، تانری اگر یئر مخلوقوندان بیرینی سئویبسه، اونونلا یاخینلیغا باشلاییبسا، باخ، اوندا همین طایفا دونیاداکی طایفالارین ان خوشبختیدیر. دئمک، همین طایفایا خوشبختلیک اوز وئره جک. بو طایفا او قدر گلیشه جک کی، اونون اولادلاریندان هانسی سا چوخ طایفالار ییغناغی اولان بویوک اولکه نین حکمداری اولاجاق. یوخسا، گوز اشله مز اولکه لری توتوب، اونلار دا حکمدار اولماق بیر آدامین گوجوندن چوخ کناردی. دئییرسن، یعنی آلان- قوا ایندی تانری زوجه سیدیر؟ سنین یانینا نکاح اوخوتدورماغا گلمیشدی؟
شامان اونون نادانلیغینا تعجب ائتدی.

یئکه نیدون، من تانرینین یانیندا کیمم کی؟ تانری نیکاحینی اوزو کسیر. آلان- قوا منیم یانیما مصلحته گلمیشدی. باجادان گئجه لر ایشیق دوشدویونو دئدی. ایشیغین سونرادان دونوب نورانی بیر انسانا چئوریلدییینی دانیشدی و گوردوم کی، بو ائللرده ان خوشبخت شامان منم کی، تانرینین نظری منیم اوباما دیکیلیب.

ایندی بو احواات او دونیادا دوبون-بیانا عیان اولوبمو؟

او دونیا تانریلارین دئییلمی؟ ایندی بو یاشادیغیمیز، یورد سالدیغیمیز کئلورئن، اونون، بیر ده توغلو چایلاری، بوتون اوتلاقلار، سولار بیزیمدی. بونلاری تانریلار وئریب. هئچ کس ده بیزیم بو یئرلری الیمیزدن آلا بیلمیر. دئمک تانرینین ایشیدیر. آلان- قوا بیزیم دوربان طایفاسیندان دئییل، اونو دوبون-بیان اوچون کورالاس طایفاسیندان آلیب گتیرمیشیک. ایندی کورالاس دا بیزیم طایفادان آسیبدیر. تانری بیزیم خانیمیمیزا وورولوبسا، اونو نه اینجیتمک اولار، نه ده توخونماق. اینجیسه، اوز طایفاسینا قاییدار و بیزیم خشبختلیییمیزی ده اوزو ایله آپارار. دوبون نه اوچون آلان- قوا ایله ائولندی؟ اونا گوره می کی، بویوک خاتونون کوی مورال دان اوغلو اولمادی؟ بس اوندا تانری کوی مورلی نییه سئومه دی؟ اونون باجاسیندا نییه ایشیق یاندیرمیر؟ سن جوخ چالیشدین کی، آلان- قوانی او دونیایا گوندرک. تانری اونون طرفینده اولاندان سونرا بیز نه ائتمه لییدیک؟ نه ائده بیلردیک؟ گئت، قربانینی کس. یوخسا ایکیمیزده تانریلارین غضبینه دچار اولاریق.

داوامی وار