کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

تاتار طایفاسینین باشچیسی تیمورچین- اوقئ و قارابوغا یئسو گئی باهادیرین یوخوسونو عرشه چکمیشدی.

قوشونو قارلی-چووغونلو گونلرده تاتار اوبالارینا یاخینلاشدیرمیش، غفیلدن اونلارین اوستونه هجوما کئچمیشدی. هئچ بیر تهلوکه گوزله مه ین و آلاچیقلاریندا شیرین یاتان تاترلارن قانی آخیدیلمیش، اوبانین مسکون اولدوغو یئرده قان گولو یارانمیشدی. قیش اولسادا، بیر گول بوغلانیردی.

بوغالانیردی... دئیهیئسوگئی اوز-اوزونه دیللندی.

سیر-صیفتینی خزین ایچینده گیزلتمیش بیریسی سوروشدو:

نه بوغالانیردی، باهادیر؟

تیمورچینین کسیک باشیندان فیشیلداییب، قارین اوستونه توکولن قان بوغالانیردی. اونون آروادینین چادیرینداکی کورپه اوغلونون بئشیییندن سوزولن قان دا بوغلانیردی. آتانین یوخ، کورپه نین قانیندان خوش بیر ایی گلیردی.

یالقوزاق قار دولان گوزلرینی قیرپا-قیرپا ایره لی جومدو. هاردان کئچدیسه، حس ائله دی کی، اوردا چوخلو آت، نه قدر آدام وار. بیر نئچه ساعات هرلندی، اما یوواسینا یول تاپا بیلمه دی، اوشویوردو. آج جاناوار لاپ پیس اوشویور. اودور کی، یوواسینی آختاریردی. هئچ اولماسا، یئرین آلتینا گیریب، جانینی قیزدیرماق ایسته ییردی. اما اونون یوواسینین اطرافینی آداملار ائله توتموشدولار کی، اوزو اورا یول تاپا بیلمه ییب، سرگردان قالمیشدی. علاجی کسیلدی. یئنه ده شونگویوب، اولاماغا باشلادی. بو اولاش لاپ ائله علاجسیزلیق، ضعیفلیک علامتی اولان بیر آغلاش ایدی، زیللییی و قانلی حکمتی ایله توک اورپه دیردی.

نها یت چووغون ساکتلشدی، هاوا آچیلدی. هر یئر گوز ایشلدیکجه آغ اورتویه بورونموشدو. بیردن- بیره بو آغ سوفره ترپندی، قونور-قیرمیزی آتلار، آرابا اوستونده کی قارا ناخیشلی چادیرلار، ناخیرلار و قویون سورولری یاواش-یاواش اوز رنگلرینی آلدی. اوردو حرکته گلدی.

یئوگئی باهادیر آتینی قاباقدا سوروردو. اونون ساققالی سئیرک ایدی. یاخیندان باخاندا گورمک اولاردی کی، بو سئیرکلیک سونیر صورتده یارادیلیب. چنه سینده توکلرین اونوندان دوققوزونو ماققاشلا دارتیب قوپارماق او واختلار دب ایدی. ایری خز پاپاغی گوزونون اوستونه ائنمیشدی. آلنیندان یوخاریدا ساچی آراذان ایکی بارماق ائنینده قیریلمیش، قالان توکلر آلنیندان قاشینین اوستونه توکولموشدو. یئرده قالان قارا توکلر آرخایا اوزادیلیب، تک بیر ساچ حالیندا هورولموشدو.

داوامی وار