کولت. آذ آذربایجانین گؤرکملی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

گوزلدی. چوخ گوزله دی آلان- قوا.

اورخان گلدی. الان- قوا گزین- گزینه خیلی فیکیرلشدی. هاردان سوزه باشلایاجاغینی بیلمیردی. آلتدان- آلتدان ائله هئی اوغلانی سوزوردو.

اورخان، عهدیمیز عهددی، دوغرومو؟ سرینیییه سی بیزیک.

بلی.

اوندا گئت، هامی یاتاندان خیلی سونرا یانیما گل. ائله گل کی، هئچ کس بیلمه سین، هئچ کس گورمه سین.

اوغلان ماتدیم-ماتدیم گوزلرینی دویدو.

ائشیت منی. گئجه لر آلاچیغا باجادان ایشیق دوشنده قورخورام. گلیب بورادا منیم کئشیگیمی چکه جکسن. اولدو؟

ماراق حسی، علاوه داها نه حس ایسه اورخانین بدنینه حاکم کسیلدی و او، غرورلا گئتدی.

همین گئجه باجادان گوز گورونمه دی. آلان-قوانین اوز ایچی نورلاندی.

اوزونو گنج بیاتلییا تسلیم ائتدی...

بیر اوووج قان

دونوز ایلینین اولییدی. قار چووغونو ایکی آددیملیقدان گورمه یه امکان وئرمیردی. چووغوندان دالدالانماق اوچون بویوک بیر اوردو دایانماغا مجبور اولوب دوشرگه سالمیش، آتلاری دایره شکلینده باش- باشا ساخلامیشدیلار. دویوشچولر کورکلری باشلارینا چکیب، آتلارین آراسینا سیغینمیشدیلار.

آج یالقوزاق قالین قار پرده سینین آرخاسیندان هئچ نه گورمه سه ده، خیالیندا آت، انسان اولدوغونو حس ائدرک، آغزینی گویه آچیب آولاییردی. بو جاناوار کیمیسه قورخوتماق، کیمیسه پارچالاماق فیکرینده دئییلدی. تکلیییندن، عاجزلیییندن، آجلیغیندان اولاییردی. ائله بیل ناله چکیر، کیمیسه کومه یینه چاغیریردی.نئچه واخت ایدی کی، یئمه یه هئچ نه تاپا بیلمیردی. یوللاردا دوشوب قالمیش لشلرده دونوب داشا دونموشدولر.

جاناوار اولاشینی دویوشچولرین آراسیندا ایری خز پاپاغینی گوزلرینین اوستونه باسیب، یومشاق درینین اوستونه اوزاناراق، کورکه بورونموش یئسوگئی باهادیر دا ائشیدیردی. هم ده لاپ یاخیندان ائشیدیردی. دوشونوردو: " بو یالقوزاق دا تانریلارا- اولولارا یالواریر. یالوار، اولا... ائله یالقوزاق دا قالیب اوله جکسن. هاوا آچیلسایدی، گوریدین منیم جاناوارلاریمی، اوزونه شکر ائدردین. گورردین یالقوزاقلاری نئجه بیرلشدیریب، واحد اوردو یاراتمیشام. سن تک باشینا بیر قویون پارچالایاندا، من اونلارین بیرجه گوجویله اولکه لر، ائللر پارچالاییرام"

شاختایا، چووغونا باخمایاراق، یئسوگئی شاد ایدی، اوره یی وحشی بیرسئوینج ایله دولو ایدی. چونکی یوردا غلبه ایله قاییدیردی.
تاتار طایفاسی سون ایللر گوجلنمیش، نورون طایفاسینا قارشی دوروب، اطاعتدن چیخمیشدی. اونلارین قوه لرینی داغیتماق، سون ایللرده چوخالمیش سورو، ناخیر و ایلخیلارینی اللریندن آلیب، اوزلریندن آسیلی وضعیتده، آج- یالاواج گونه سالماق اوچون یئسوگئی باهادیر خیلی دوشونوب- داشینمیش، آخیردا هجوم ایلینی شامانلارین کومه یی ایله تعیین ائتمیشدی. دونوز ایلی مناسب، قیشین سویوغو و سرتلییی ده الوئریشلی حساب ائدیلمیشدی.

داوامی وار