کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

آخشام دوشموشدووو. بوتون آلاچیقلاردان اونون شرفینه کسیلن دایچا، قویون و دانالارین اتیندن گتیریردیلر. اونلاری دا بایات طایفاسیندان اولان نوکر یئربه یئر ائدیردی. آلان- قوا هئچ نوکرین آدینی دا بیلمیردی. بیردن- بیره نوکره فیکیر وئرمه یه باشلادی. اونون دوز قامتی واردی. اوزو ده چوخ جاوان ایدی. هئچ واخت باشینی قالدیریب، خانیما دیک باخمازدی. آلان- قوا فیکره گئتدی...

فیکیرلش، آلان- قوا! مکر فیکیرلش!...

آلان- قوا باشقا مناسب آدام تاپا بیلمه یه جکدی.

بیر دفعه نوکر ایچریدن نه ایسه آپارماغا گلنده خاتون اونو ساخلادی.

بورا باخ، سنین آدین گرک کی...

اورخاندیر، دئیه گنج جاواب وئردی.

سن بایات طایفاسیندانسان. بس سیزین طایفانیز هارداندیر؟

اوغلان باشینی یانا آییب دئدی:

بابامین دئدییینه گوره، هله یادا گلمه ین بیر واخت قارا خان بیزیم طایفانین بیر حصه سینی اوزاق گون باتاندان گتیریب.

سن کیشینین نه دئمک اولدوغونو بیلیرسنمی؟

بیلیرم خانیم. کیشی وئردییی سوزه عمل ائدر، سر آچماز، ناموس اوستونده اولومه گئدر.

ساق اول، سن بونلارین هامیسینی بیلیرسن. بس بو سوزلره عمل ائله یه بیلرسن؟
بلی، خانیم.

ائشیتدیییمه گوره کنیزیمیز چیچکله...- اوغلان قیزاردی.. اونو بیلیرم و سنی ائولندیررم. سنی ان آدلی-سانلی جاوان ائله یه رم.

چوخ ساق او خانیم.

بو سورغو- سوالی چیچه یه دئیه جکسنمی؟ دئمه.باش اوسته. کیشی هر سوزو دئمز.. اوزون بیل، سوزه عمل ائله مه سن، سنی ایلیم-ایلیم ایتیره جه یم. چیچه یینی ده همچینین. اونون دا اوزونو گورمه یه جکسن.

هده لمه، خانیم. آرخایین اول. بیزده دئییرلر: سوزومدن دونر اولسام، قیلینجیما دوغرانیم، اوخوما سانجیلیم!

یاخشی، ایندی گئت، ایشلرینی گور، قورتاراندا یانیما گلرسن. سنه بیر تاپشیریقیم اولاجاق.

ال- آیاق چکیلنه یاخین آلان- قوا چیچه یی چاغیردی. قیز توی- بایرام لباسیندا ایدی. الی چالیب، آیاغی اویناییردی. او شبهه لندی.- نه اولوب؟ خانیم اونون شادیانالیغینا حیرتلندی.

نئجه نه اولوب، خانیم؟! بس شامانین دئدییینی ائشیتمه دین؟ بیزیم طایفا دا تانری نوروندان یارانیب.

هه. ائله دیر. بونا گوره ده سنین خوشبخت اولماغا، کنیزلیکدن دونوب، خانم اولماغا تام حقین وار.

قیزتعجبله باخدی:

من، خانم؟ اینجه سسله سوروشدو.

بلی. گوز آلتین یوخدور کی، دوزونو دئ!

منیم؟ منیم نه ایختییاریم وار اوزومه اوغلان سئچم؟

اوندامن سئچه جه یم. بورا باخ، بیزیم اوغلان وار، اورخان. اوندان خوشون گلیر؟
قیز قیزاردی:

بیلمیرم.

او بو گون سنه بیر سوز دئییبمی؟

بلی.

نه دئییب؟

گون اورتا دئدی کی، قاب چاتمیر، آلاچیقلاردان ات قویماغا قاب آل. – بس سونرا؟

چیجک گولدو:

آی خانیم،- سویله دی، تانری حقی، او ائله قاراقاباقدی کی، اوندان گونده بیر سوز ائشیتمک هر آدامین ایشی دئییل.

آلان- قوا ایناندی کی، دوغوردان دا اورخان اونا هئچ نه دئمه ییب.- یاخشی، گئت، یات. ماراقلانان اولسا، دئییرسن کی، شامان دئییب بو گئجه گوی ده ایشیق گورونمه یه جک. هئچ کیمی آلاچیغین هنده ورینه بوراخماسینلار. اورخانی یانیما گوندر! یالنیز اونو.

داوامی وار