کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

یئکه نیدون بو دلیللر قارشیسیندا هئچ نه دئیه بیلمییب، قالخیب دالی-دالی چکیلدی و آلاچیقدان چیخاندا آیاغی تکره ایلیشدی و آرخاسی اوسته ییخیلیب گولونج بیر وضیت آلدی. هئچ واخت گولمه ین شامانین دا دوداغی قاچدی، گوزلری گولدو. اونلار غالب گلمیشدیلر. یئکه نیدون اودوزموشدو.

اونون دالینجا قیشقیردی:

تانریلارینا دعا ائت کی، اونلار دوبون- بیانا ایکی اوغلان وئریب، طایفانی اومودسوز قویماییبلار!

سونرا آلووون ایچینه بیر چیمدیک باریت آتدی. یاشیل آلوو قالخدی. تند ایی یئکه نیدونون پئیین و تر اییینی آلاچیقدان قوودو. باشقا جور اونون پیس اییی آلاچیقدان چکیلمزدی.

آلان- قوا اوزانیب، یئنه ده فیکره گئتمیشدی. یوخوسونا گیرن، یوخودا اونونلا یاشایان قیرمیزی ساققال، ماوی گوز کیشیدن اولادی اولاجاقدیمی؟ او، آخی، کیشینی گوندوز ایشیغیندا اصیل کیشی کیمی یوخ، خیال، یوخو شکلینده، رویادا گورر و اونون وارلیغینی ارینینکی کیمی حس ائتمه میشدی. اول بلکه ده بونو اوزو اوچون شیشیردیر، حقیقتلشدیریردی. بو گون ایسه او، هله لیک غالب گلمیشدی. اما سونرا، سونرا نئجه اولاجاق؟ تانریدان اولادی اولماسا، اونو قدیم دده- بابا اصولو ایله جزالاندیراجاقلار، یئره اوزادیب، اوبانین بوتون آرابالارینی اونون اوستونه ی ییغاجاقلار، بویوک بیر تاخت دوزلدیب، هامیلیقا اونون گوبه یی اوستونده اوتوراجاقلار، تا کی، اونون بوتون سوموکلری اونا دونسون، تورپاغا قاریشسین، کولک اسسین، هر یئره یایسین.

دوز دوققوز آیدان سونرا او آلاچیقدا یئنی بیر کورپه دونیایا گلمه لییدی، اوزو ده اوغلان. آناسی کیمی آغ، قارابنیز طایفا جاوانلارینا اوخشاماز.

بو گون شامانلا صحبتلریندن سونرا او خیلی آییلمیش، هر شئیه آچیق گوزله باخماغا باشلامیشدی. شامان اونون گوزلرینی آچیب، حیاتی گوسترمیشدی. ایندی اوره یینده قالخان بو فیکری ده ائله اونون گوزلریندن دویموشدو. چونکی شامانین عاغیللی، درین گوزلری تئز-تئز اونون بلکه ده اولاد یاتان قانینا دیکیلیردی و بو باخیشی چوخ شئی دئییردی. شامانلا صحبتیندن سونرا اونا معلوم اولموشدو کی، کورالاس طایفاسیندان گلن بو گلین آرتیق دوربان طایفاسینین حاکیمیدیر و اونون الینین اوستونه ال یوخدور. اگر دوققوز آیدان سونرا اولادی اولماسا، او نه تانرینین آروادی، نه دوربان طایفاسینین حاکیمیدی، نه ده بو کورپه لرین آناسیدی. هر شئی الدن چیخار. تئزلیکله بیر چاره تاپماق لازیمدیر. اما نئجه؟

او، کیمی اوز یاتاغینا یاخین بوراخمالیدیر کی، کورپه قیییق گوزلو،قاراشین اولماسین؟همین گنج اونون اورهیینجه اولسون و بو سری اوزو ایله قبره آپارسین؟

گور، قادینین قارشیسیندا نه قدر چتینلیک، قورخولو ایش دایانیردی!

داوامی وار