سون ۲۷۰ ایلیمیزده - نادر شاه‌دان اوزو بری تاریخیمیزده ۸ نویابر قدر پارلاق غلبه‌میز یوخدور!

۸ نویابر - ظفر گونو مقدس، احتشاملی و ایشیقلی گوندور. چونکی بو گون یالنیز بیر غلبه‌نین الده ائدیلمه‌سی، بیر محاربه‌نین سونلانماسی دئییل، ۳۰ ایللیک حسرتین بیتمه‌سی، ۱۰۰ ایللیک یارانین کسیلیب-آتیلماسی، ۲۰۰ ایل اؤنجکی اوزون هدفلره حسابلانان «کؤچ»ون فسادلارینین بیر حیصه‌سینین تمیزله‌نمه‌سی، عدالتین برپاسی، ملی ایرادنین طنطعه‌سی گونودور.

۲۰۲۰-جی ایلین نویابرین‌دا آذربایجان خالقی اؤز تورپاقلارینی آزاد ائتمکله تکجه بیر محاربه‌نی دئییل، عصرین عدالتسیزلیینی ده سونا چاتدیردی. بو غلبه مستقیل آذربایجانین گوجونو، اوردوسونون قدرتینی، خالقینین بیرلیینی و پرزیدنت ایلهام علیئوین دمیر اراده‌سینی دنیایا گؤستردی.

آذربایجان اوردوسو ۴۴ گونلوک وطن محاربه‌سین‌ده هر بیر قاریشی قانلا آزاد ائتدی، لاکین شوشانین آلینماسی بو ساواشین زیروه‌سی‌دی.

شوشا تکجه بیر شهر دئییل، آذربایجانین معنویات و مدنیت پایتختی، میللتین روحونون، قلبینین سیموولودور.

آذربایجان عسگری قایالاری، سیلدیریمی قالخاراق شوشانی آلدی - بو، دنیانین هئچ بیر اوردوسونون ائتمه‌دیی، گؤرونمه‌میش، مثلی-برابری اولمایان بیر قهرمان‌لیق ایدی.

او گون سانکی جیدیر دوزونده یالنیز عسگرلریمیز یوخ، شهیدلریمیز ده واردی. بوتون روحلار ۳۰ ایللیک اضطراب‌دان سونرا ظفریمیزین پایتختینا توپلاشمیشدی. او گون بیر باشقا گون ایدی! شوشانین آزادلیغی بوتون ملتین روحونون آزادلیغی ایدی. بیز ملت اولاراق، فرد اولاراق او گون بؤیودوک، بؤیوک اولدوق، اوجالدلق، یوکسلدیک...

بو ائله بیر دویغو، یاشانتی، حسیات‌دیر کی، اونو - او گونو تصویر ائتمک، تصوور ائتمک، ترنم ائتمک، ایفاده ائتمک ممکونسوزدور. نه یازسان، سؤنوک قالیر او نهنگلیین قارشیسین‌دا! نه قدر شوکر ائتسک آز... نه قدر دعا ائتسک آز... نه قدر تعریف ائتسک، آز گؤرونور...

بیز او گون دوغولدوق سانکی!

او گون پاسپورت آلدیق!

۸ نویابر - هامیمیزین آد گونوموزدور...

ظفر گونو هم ده بیرلییمیزین سیموولودور!

۴۴ گون عرضین‌ده آزیاشلی اوشاغیندان آغساققالینا قدر هر کس «قاراباغ آذربایجان‌دیر!» دئیه‌رک بو مبارزه‌ده اشتراک ائتدی. بو میقیاس‌دا بیرلیک تاریخیمیزده بیر ایلک ایدی.

جبهه‌ده دؤیوشن عسگرله، آرخادا دعا ائد‌ن آنا، عسگر ماشینلارینین اؤنونو کسیب هر شئیینی - جانینی، اوریینی، گوجونو، روحونو او عسگرلره وئره‌ن عینی نیتله، عینی اووقاتلا یاشاییردی. هر کس "وطن ساغ اولسون!" دئییردی. آذربایجان سئوگی‌سینین اوجو-بوجاغی یوخ ایدی.

هر یئرده، هر ائوده او گونلرده بیر بایراق، بیر دعا، بیر امید، بیر احتشام، بیر شوق واردی. بو، تکجه حربی دئییل، معنوی ساواش ایدی. بیزیم او ساواشی اودماغا اشهدو-احتیاجیمیز واردی...

شوشانین آلینماسی ایله دوشمن تکجه مغلوب اولمادی، آذربایجان خالقینین بیرلیینین، اراده‌سینین قارشی‌سیندا دیز چؤکدو، چیلیک-چیلیک، پارامپارچا اولدو، دارماداغین ائدیلدی.

بو گونون سئوینجی، فرحی، عظمتی شهیدلریمیزین قانی باهاسینا قازانیلیب.
اونلارین هر بیری بو تورپاق، بو بایراق اوچون جانینی قوربان وئریب.

بیزیم بورجوموز اونلارین روحونا صادق قالماق، بو غلبه‌نی قوروماق، وطن سئوگی‌سینی گله‌جک نسیللره اؤتورمک‌دیر.

ظفر گونو - یالنیز قورور دئییل، مسئولیت گونودور.

چونکی بو غلبه بیزدن داها چوخ عدالتلی، گوجلو، مدنی، وطنپرور بیر گله‌جک قورماغی، آذربایجانی داها دا گوجلندیرمه‌یی طلب ائدیر.

بو گون ظفر بایرامینی تکجه آذربایجان دئییل، بوتون تورک دنیاسی قید ائدیر.

چونکی بو غلبه یالنیز بیر خالقین دئییل، بوتؤولوک‌ده تورک اراده‌سینین، عدالتین و حاقلیلیغین غلبه‌سی‌دیر.

ظفر گونو - یئنیلمزلیین، دولتچیلیین و ملی غرورون بایرامی‌دیر.

ظفرین ایشیغی آرتیق بو تورپاغین هر داشینا، هر چینقیلینا هوپوب.
او ایشیق هر بیریمیزین اوریینده‌دیر...

قوی، هر ۸ نویابردا بایراغیمیز داها دا اوجادان دالغالانسین!

بو بایراق، بو تورپاق، بو ظفر آذربایجانین‌دیر!

ظفر گونوموز مبارک!

شوشامیز مبارک!

یئنی‌دن دوغولوشوموز مبارک!