کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

آتلی بی زاده نه قدر ائله دیسه، حسین کیشی اونون سبدینی گوتوروب آپارماغینا راضیلیق وئرمه دی. آتلی دا اونونلا حدافظلشیب، چاپیب گئتدی کی، هئچ اولماسا، اوزاقدان دا اولسا، امیر چوبانی گوره بیلسین.

یول ناخچیوان چایینین کناری ایله اوزانیردی و حسین کیشی گوردو کی بیر نئچه آدام چایدا آتلارینی یویور. اوزلری ده بو یئرلرین آداملارینا اوخشامیرلار. اونلاردان بیری لاپ یاخیندان دایانمیشدی. حسین کیشییه باخیب، الی ایله اشاره وئردی. کیشی دایاندی. سرپوشلو، دمیر گئییملی، قولچاقلی آدام یاخینلاشدی.

پوزوق بیر دیلده سوروشدو:

امیر چوبانین ائوی حاردادی؟

شهرده دی.

شهرین هاراسیندادی؟

حسین کیشینین دالاغی سانجدی. گوردو کی، بو دوز آداما اوخشامیر.

آی قوناق، والله، بیز قوناق سئون آدامیق، اما من هارا، امیر چوبان هارا؟ منی اونون یانینا کیمدیر بوراخان؟ ائویمه گلرسن، قوناق اولارسان. آنجاق نه دئییم؟ شهرین حاکمی وار، دارغاسی وار، نه بیلیم قالابییسی وار. اونلارین هانسینا دئسن، سنی اونون یانینا آپارار. هم ده من قوجا کیشی یم. منیم آیاغیملا گئتسن، گرک نه قدر واخت صرف ائده سن.

یاخشی، کیشی، هئچ کیمه هئچ نه دئمه. بیز پادشاه آتلیلاریییق، اونا واجب سوز دئمه یه گلمیشیک. بونو گرک اوزوندن باشقا هئچ کیم بیلمه سین.

حسین کیشی یولونا دوام ائله دی. اما فیکری او آتلی لارین یانیندا قالدی.

....حسین کیشی امیر چوبانین اوتوردوغو اوتاغا گیریب، اونونلا گوروشنده آخشام دوشموشدو. امیرین یانینا او قدر آدام گلمیشدی کی، هئچ جور اونو تک گوروب، سوزونه دئیه بیلمیردی. امیر الامرانین بوینونو قوجاقلادی. آلنیندان اوپدو

داوامی وار