جهان شاه قاراقویون‌لو دؤولتینین بانی‌سی قارا یوسیفین اوچونجو اوغلو اولوب.

کولت. آذ خبر وئریر کی، دوغما آذربایجان تورکجه‌سین‌ده گؤزل شعرلر یازمیش جهانشاه ادبیات تاریخیمیزده "حقیقی" تخلصو ایله تانینیر.
یوکسک تحصیل گؤرموش حقیقی آذربایجان تورکجه‌سی و فارس دیلین‌ده گؤزل غزللر، مثنوی و روباعیلر یازیردی. او، شرق ادبیاتینا دریندن بلد ایدی و اؤزونو نسیمی مکتبینین آردیجیلی حساب ائدیردی. حقیقی داهی فارس شاعری عبدالرحمان جامی ایله دوستلوق مناسیبتی ساخلاییردی. جامی اونون "دیوان"اینین بدیعی و معنوی کئیفیتلرینی یوکسک قیمتلندیریردی. اؤز شعرلرین‌دن بیرینده او، بو دیوانی "خزینه" آدلاندیرمیشدی.

"دیوان"اینین ماجراسی دا شاعرین حیاتی قدر ماراق دوغورور. جهانشاهین ان یئنی الیازما دیوانینی فیروز رفاهی علمداری تهران اونیورسیتتینین مرکزی کیتابخاناسین‌دا تاپیب و تهران‌دا نشر ائدیب. بو الیازما حاضردا آشکار اولونان الیازمالارین آراسیندا ان مکملی ساییلیر.

حقیقی شرق فلسفه‌سینه ده دریندن بلد ایدی. شاه اولماسینا باخمایاراق، او، نعیمی و نسیمینین تبلیغ ائتدیی حروفیلیین فعال آردیجیللارین‌دان اولوب:

وصالینی دیلرام کام ایل‌ن ز فضل لله
من شکسته‌یه کام وصال بئیله گرک.

یارادیجیلیغینین آشکار حروفی ماهیتی داشیماسینا باخمایاراق، ماراق‌لی‌دیر کی، جهانشاه تبریزده نعیمینین قیزی باش‌دا اولماقلا ۵۰۰ حروفی اعدام ائتدیرمیشدی. بورادان دا بئله نتیجه‌یه گلمک اولار کی، حقیقینی حروفیزمه جلب ائد‌ن یا مناسیب پوئتیک فورمالار، یا دا بعضی حروفیلرین یئریتدیی سیاست‌ده تیموریلرین علیهینه یؤنلمیش ایستیقامت اولوب.