آنا صحیفه کولت |
دئسپینا، قسطنطنیه پادشاهی، آلتینجی کنستانتین ایله ائولنهجک ایدی، آنجاق بو ائولیلیک گئرچکلشمهییب. ۱۴۵۸-جی میلادی ایلینده او اوزون حسن ایله ائولندی، و بو ائولیلیک اونو چوخ مشهور ائلهدی. دئسپینانین گؤزللیگی بیر چوخ متنده قئید اولونوبدور. ایتالیان سیاح، راموسیو، یازیلادیندا بئله گتیریب: "بو چاغدا ترابوزاندا کالو ژوئانیس (دؤردونجو ژان) حکومت ائدیردی. او خریستیان ایدی و دئسپینا کاتون آدلی چوخ گؤزل بیر قیزی واریدی. اونون گؤزللیگی و کاراکتئری دیللر ازبری ایدی." بو حیکایه بیر آز آبارتیلی اولموش اولسا دا، اوزون حسنین بو یونانلی خریستیان قیز ایله ائولنمهیه ماراقلانماسی، اونون حدسیز گؤزل اولماسینین گؤسترگهسیدیر. اوزون حسن اونون آتاسینا سؤز وئردی نیظامی قوهلرینی ترابوزاندان دفاع ائتمهیه گؤندرسین و دئسپینایا دا اذن وئردی اؤز خریستیان دینینی اؤزگورجه اونون درباریندا قوروسون.
ترابوزانلیلارا گوره آققویونلولار پادشاهی ایله ائولنمک ان عاغیللی ایش ایدی. ۱۴۵۳-ده، قسطنطنیه یئنیلمهسیندن سونرا، ترابوزان اورتودوکس خریستیانلق و بیزانس امپراتورلوغونون سون سنگری ایدی. عثمانلی تورکلر، قسطنطنیهنی آلدیقدان سونرا، دفعهلرجه ترابوزانا حمله ائتدیلر. بو اوزدن، عثمانلیلارلا یاخشی رابطهلری اولمایان آققویونلولارلا بیرلشمک، عثمانلیلارین حملهلرینی دفع ائلردی. آما بو ائولیلیک بیر چوخ خریستیان اوچون شاشیردیجی ایدی، چونکو بیر یونانلیی خریستیان قیز، مسلمان بیر پادشاه ایله ائولنیردی. بو ائولیلیگین اورتودوکس خریستیانلیق دینینده سورونلو اولدوغونا رغمن، دوردونجو ژان، بو اتحادین فایدالارینی دینی سورونلاردان داها اوستون توتوردو. لاکین ترابوزا- اوزون حسن متحدلیگی ۱۴۵۹ میلادی ایلینده، دؤردونجو ژان-ین اؤلمهسی ایله سوستالدی. ژانین جانشینی اولان قارداش دئیوید، دئسپننانین عمیسی، اوزون حسن ایله ایلیشکلرینی آزالتدی. دئیوید، رومدا پاپدان یاردیم ایستمک قرارنا گلدی.
بو زامان دئسپینانین حیکایهسی باتی اؤلکهلرینده یاییلدی. عثمانلی ایکینجی سولطان محمد، ۱۴۶۱ میلادی ایلده، بیر داها ترابوزانا هجوم ائلهد، بو ایسه اوزون حسنله ساواشا گیریمهسینه سبب اولدو. دئیوید ایله ایلیشکیلرینین سوست اولدوغونا گؤره، اوزون حسن ایکینجی سولطان محمد ایله ساواشماقدان ال چکدی و ۱۵ آگوست ۱۴۶۱میلادی ایلینده ایکینجی سولطان محمد ترابوزان حمله ائلهییب اونو آلدی، بئلهلکله کوننه امپراتورلوغونا سون قویدو.
۱۴۶۳-ده آدریانوپولدا سولطان محمدین توتساغیندا اولان ترابوزان پادشاهی و اوغوللاری، دئسپینایا بیر مکتوب یازدی. بو مکتوبدان خبردار اولا سولطان محمد امر ائلهدی دئیوید و اوغوللارینی اعدام ائتسینلر. ترابوزان یئنیلمش اولسا دا، اوزون حسن هله ده عثمانلیلار اوچون بؤیوک بیر خطر ساییلیردی. ترابوزانین یئنیلگیسی و عمیسینین اعدامیندان سونرا، هم ده اوزون حسنی ساواشماغا راضی ائدهبیلمهدیکدن سونرا دئسپینانین سون اومودلاری یوخا چیخدی. دئسپنا و اوزون حسن عؤمورلرینین سون ایللرینی هارپورتدا بیر سارایدا قیزلاری ایله بیرلیکده گئچیرتدیلر. اونون یاشامینین سون ایللری عیبادتده گئچدی. ۱۴۷۸-ده، اری اؤلدوکدن سونراکی یاشامیندان ائله بیلگی الده یوخدور. او دیاربکرده بیر کیلسهده تورپاغا وئریلدی.
دئسپینانین نئچه اؤولادی واریدی. ان تانینمیشی مارتا (حلیمه) ایدی. او بیر اولادلارینا گؤره آز بیلگی الده وار. حلیمه، اردبلیده صفویه خانقاهینین رئیسی، شئیخ حیدرله ائولندی. بو ائولیلکدن، سونرالار شاه اسماعیل صفوی آدلاندیریلان بیر اوغلان دونیایا گلدی. شاه اسماعیل صفوی بوتون ایرانی فتح ائلهییب، عثنی عشری مذهبینی ایرانین رسمی مذهبی اعلان ائدیب صفویه سلسلهسینی قوردو.
تاریخ
2020.03.28 / 21:42
|
مولف
Axar.az
|