Axar.az
یوخاری


«طوفانلی تبریز»- اوچونجو بؤلوم

آنا صحیفه کولت
12 Punto 14 Punto 16 Punto 18 Punto

تورکجه‌یه چئویردی:سوسن نواده‌رضی

او گون‌لر سکگیز- زاد یاشی اولاردی. دفعه‌لرجه سریه ننه‌دن بونو دویموشدو: "سئل گلنده سنین سکگیز یاشین واریدی."

او آن‌لاری یاخشی‌جا آنیمساییردی. بیردن گؤی گورولدادی. بولودلار دالبادال نعره چکیردی. آردیندان یاغیش سئلله‌مه یاغماغا باشلادی. ساعاتلارجا یاغدی. سونرا بیردن کوچه‌لرده های-‌کوله‌ک قووزاندی کی: "سئل گلدی... سئل گلدی... قاچین!"
اونلارین ائوی مینه‌ججیم خیابانیندا، چوخورلار محلله‌سینده‌ ایدی. یاشلی‌لار بئله دئیردیلر کی، ایل‌لر اؤنجه بوردا کرپیج کوره‌لری واردی. تورپاق قازمالار نتیجه‌سینده هر یئر چوخورلاشیب‌دیر.

ریضا شاهین امری ایله، تبریزین هاوا آلانینی شهرین قوزئیینده (شیمالیندا)، "آجی" دوزه‌ن‌لییینده، "آناخاتین" کندی‌نین گونئیینده دوزه‌لدیردیلر. او زامان "آجی‌چای" کؤرپوسونون بویونجا بیر خیابان سالدیلار. مینه‌ججیم کورپوسوندن کئچن بو خیابانین آدی دا مینه‌ججیم خیابانینا معروف اولدو. بو خیابان "آجی‌چای" کؤرپوسوندن باشلاییر، امیر باغی‌نین یانیندان، "یئکه‌توکان‌لار"دان و امیره‌قیز محلله‌سی‌نین غرب طرفی‌نین آخیریندن، و ستارخان باغیندان گئچیردی، و مینه‌ججیم کؤرپوسونه یئتیشیردی. سونرا دا چوستوزلار محلله‌سیندن، چوخورلارین اورتاسیندان و "وَرجی"(ویجویه)دن و "قره‌داش" مسجیدی‌ندن، "قرآغاج" محلله‌سیندن تا گجیل قبریستانینا کیمی اوزانیردی، سونرا دا قونقاباشی و شهرین باشاباش شرقیندن غربینه چکیلن "پهلوی" خیابانیندا قورتولوردو.
مینه‌ججیم خیابانی، چوخورلار محلله‌سینی ایکی شرقی و غربی بؤلومه آییرمیشدی.

سئل گئت گئده یوخاری قالخیردی، پالچیقدان تیکیلن ائولر آرد- آردا ییخیلیب تؤکولوردو. محلله‌نین شرقی بؤلومونده‌ اوتوران‌لارین چول- پالازی سئل‌‌له آوار آلتینا گئدیردی. چوخورلار محلله‌سی‌نین شرق طرفی گؤله دؤنوشموشدو. چوخورلارین غرب طرفینده ساکین اولان‌لار، سو ائولرینه دولماسین دئیه، کوچه‌لری‌نین آغزینی قوم و تورپاق دولو تلیس‌لرله هؤروردولر.

بؤیوک اوشاق‌لار آتالارینا یاردیم ائدیردیلر، حوسئن کیمی کیچیک‌لر ایسه، قورخولاریندان تیر- تیر اسیردیلر.
یاخشی‌جا خاطیرلاییردی، جمعیتین آراسیندا قورخموش، چاره‌سیزجه دایانمیشدی، سریه ننه گلیب اونون الیندن یاپیشیب اؤزویله آپاردی.
او گئجه محلله‌نین چوغو آدام‌لاری "علی سیاهپوش" مسجیدینده یاتدیلار، چونکی اورا هوندور یئرده ایدی.
سریه ننه دئییردی:

-قورخما ننه، بورا آللاهین اؤز ائوی‌دیر. بوردا آللاه هئچ کیمه غضب ائله‌مز.
-او سریه ننه‌دن سوروشدو:

-نیه آللاه آدام‌لارا غضب ائلیر؟

سریه ننه جواب وئردی:

-من نه بیلیم. دئییرلر گوناهکارلار چوخالیب.

یارین سحر، گون چیخاندان سونرا، هامی مسجیددن ائشییه چیخدی. خیابانین او تاییندا، چوخورلار محلله‌سی‌نین شرق طرفینده، بوتون ائولر سویون آلتینا گئتمیشدی. تکجه کلبه عیززت عمی‌نین ائوی سئلدن آماندا قالمیشدی. هم ده او، محلله‌نین او بیری آدام‌لاریندان داها وارلی ایدی. ائوی بؤیوک و چوخ دا مؤحکم ایدی. حیه‌طی‌نین بؤیوک و صفالی باغچاسی‌نین آراسیندان دا دولغون بیر چشمه‌کئچردی. محلله‌نین آروادلاری بو چشمه‌ده پالتار یوواردیلار.

کلبه عیززت عمی‌نین کوچه‌قاپی‌سی سحردن گئجه‌یه کیمی قونشولارین اوزونه آچیق اولاردی. او بو ایشی آللاه یولوندا احسان ائلمک بیلردی.

سئل یاواش یاواش یاتیشیردی. محلله‌اهلی‌نین اسباب- اثاثی سویون اوزونده اوزوردو. "دلی حبیب" بیر تخته پارچاسینی قاییق ائله‌میشدی کوره‌ک ووراراق قاییق سوروردو و سویون اوزونده‌کی خیرت- پیرت‌لاری ییغیردی.

داوامی وار...

تاریخ
2020.04.01 / 22:19
مولف
سعید منیری
شرح لر
دیگر خبرلر

دیلیمیزی گؤیه قال‌دیران روس یازی‌چی‌سین‌دان آذربایجان دیلی حاق‌دا

تاریخه مهرونو ووران افسانوی حسن‌لی تپه‌سی- فوتو

«تراکتور» اون تشببوسکاری قافار کندلینین چاوشئسکو ایله گؤروشو

بهبودووون ماهنی‌سی اوغورلاندی: قیزی چاغیریش ائتدی - ویدئو

محبت حاقین‌دا ان یاخشی ۱۰ کیتاب

داهی یازیچینین اؤلومسوز عشق مکتوبو - فوتو

داهی یازیچینین اؤلوم تاریخی نیه اخلاق‌سیز قادینلار اوچون ماته‌م کیمی قئید اولونور؟

داهی روس شاعرینی باکییا باغلایان نه ایدی؟ - علی آغا واحیدله...

نئچه گون سس‌سیزلیکدن سونرا، دوسیانین «اؤزل آراشدیریلاجاغینی» بیلدیریبلر...

تارزه‌نیمیز ایرانین میللی آلتلر اورکئستریله «لایلا» ایفا ائتدی

خبر خطّی
 
Axar.az'da reklam Bağla
Reklam
Bize yazin Bağla