تورکجه‌یه چئویردی:سوسن نواده‌رضی

حوسئن آتا- آناسی‌نین اوزونو هئچ اصلن خاطیرلاماییردی. اونلاردان بیلدییی یالنیز سریه‌ننه‌نین دفعه‌لرجه دئدیکلری ایدی. او بئله نقل ائلردی کی:

رحمت‌لیک آنان سنی دوغاندا اؤلدو. سنین باشین چوخ یئکه و غیرعادی ایدی. یازیغی چوخ جیردین. آتان تعریف ائلردی کی، آنان ایکی گئجه- گوندوز سانجی چکدی سنی دوغونجا. سونرا دا قان آپاردی بیله‌سینی. او زامان‌لار، دوکتور، مریضخانا، نه بیلیم عمل اوتاغی زاد یوخیدی. اولسایدی دا سنین آتا-‌ آناوین الی چاتمازدی اونلارا. ائله ایندی ده ازماچوخ ائله دیر. ایندی ده زاهی‌لاری او گون‌لر کیمی ائولرده، محلله مامالاری- کی قاری قوجا آروادلاردیرلار- دوغوزدورور. آتان دئیردی: "صفا خالا- محلله‌نین یاشلی ماماسی- هر نه قدر داوا- درمان وئردی، آناوینن قاناماسی‌نا علاج ائلیه بیلمه‌دی. او اؤلندن سونرا یازیق آتان بیلمیردی نه ائتسین. اونون تبریزده هئچ کیمی یوخ ایدی. بیر نئچه ایل اولاردی طرزم کندیندن تبریزه گلمیشدی، میر ابوالحسن ساراییندا حامباللیق ائلیردی. آخیرده ده قونشولار اونون دادینا چاتیب منی تاپدیلار. او گون‌لر منیم ده اوشاغیم تازا اؤلموشدو. دؤش‌لریم سوته دولموشدو، اوره‌ییم ایسه غمه، بیریجیک جییه‌رگوشه‌مین غمینه. سن ده آتا- آنانین ایلکیسی ایدین. ایلک دفعه دؤشومون گیله‌سینی آغزینا قویدوغومدا، ائله بیل کی گولدون. ائله بو گولوشون منی سنه اوره‌کدن باغلادی. سونرالار بؤیودویونده گؤردوم دوداغی‌نین گوشه‌سینده بیر ایری‌لیق وار، گؤرن دئییر بس کی گولورسن. او گوندن، و سونراسی گونلر سنه سود وئردییمده، دویاندان سونرا گولردین. سنه او قدر باغلاندیم سانکی اوشاغیم اؤلمه‌ییبمیش. سن اونون یئرینی توتموشدون، لاپ دا گؤزل توتموشدون..."

سؤز بورا چاتاندا سریه ننه‌نین گؤزلری دولاردی. حوسئنین ده اوره‌یی توتولاردی. بوغازینی قهره‌باد باساردی، ایستردی آغلاسین، سریه ننه دئیردی:
-حوسئن گینه ده سن گولورسن؟
-یوخ واللاه، اوره‌ییم توتولوب، آغلاماغیم گلیر.
-سنین آغلاماغین‌لا گولمه‌یی‌نین هئچ فرقی یوخدور. ائله بونا گؤره قانیم سنه قاینادی. سن یاخشی اوشاق ایدین. آتان رحمت‌لیک منیم سنی نئجه سئودییمی گوردوکده آه چکیب دئدی:
-حئییف کی ارین وار!

منیم ده اریم حامبال ایدی. تبریزین مظفریّه سراییندا ایشلردی. سحردن آخشاما کیمی، بالالی- بؤیوکلو فرش‌لری آتاردی چیینینه، موشتری‌لرین ائوینه یا دا او بیری تیمچه‌لرده تاجیرلرین حوجره‌سینه داشی‌ییب یئربه‌یئر ائلردی. او همیشه قیچ آغری‌سیندان، بئل آغری‌سیندان زاریلداردی. بیزیم ائویمیز، امیره‌قیز محلله‌سینده، "ایریلی‌لر" مسجیدی‌نین دالیندایدی. او گون‌لر هله بو سدّی دوزه‌لتمه‌میشدیلر. هردن بیر سئل گلردی. جماعاتین دیرلیغینی قاتیب قاریشدیراردی. آتان هفته‌ده ایکی- اوچ یول سنی گورمه‌یه گلردی. گلنده ده اؤزویله یئمه‌لی –زاد گتیرردی، یئییم سودوم چوخالسین. اریم ناخوشلادی. آیاق‌لاری شیشدی. سانجیدان هارایی گویه گئدردی. بیر گون ایشه‌مه‌یی کسیلدی. هر نئینه‌دیک فایداسی اولمادی. گونو گوندن رنگی ساپساری سارالیردی. بدنی ده شیشدی. نئچه گون چوخ بتر سانجی‌لار چکدی. آخیرده ده اؤلدو، من دول قالدیم. عیدد‌م چیخاندان سونرا، آتان گلدی ائلچیلیییمه. من امیره‌قیز محلله‌سیندن، چوخورلار محلله‌سینده سیزین ائویزه گلدیم. سنین آتان شرفلی کیشی ایدی. چوخ ایشلردی. چیخارتدیغینی دا سنه- منه خرج‌لردی. من سنی اؤز سودوم‌له بؤیوتموشم. اینتهاسی سنین ده آتاوین سونو منیم اوولکی اریم کیمی اولدو. او دا، کؤکسونون آغریسیندان زارییاردی. دئیردی: "سریه، آغیر یوک گوتورنده، نفسیم کسیلیر. اوره‌ییم یامان چیرپینیر. تر گؤتورور بیله‌می. آما چاره نمنه‌دی، سنینله حوسئنین قارنینی دویورمالی‌یام." بیر گئجه، سحره کیمی کوکسونون آغری‌سیندان سیزیلدادی. نه قدر گؤیزابان دمله‌ییب ایچیرتدیم بیله‌سینه کار کسمه‌دی. گئجه یاریسی، اونو "سامان مئیدانی"ندا میرزه ایبراهیم حکیمه آپاردیم. او دا بیر آغ توز وئردی. گلدیک ائوده اونو یئدی. گینه ده توختامادی. سحره یاخین ایدی، اوره‌یی سسدن دوشدو. من قالدیم، بیر ده سن، بیر ده چوخورلار محلله‌سینده بو شئه زئرزمی. او گون‌لر سنین دؤرد یاشین واریدی، آتان بیزی اؤزباشیمیزا قویوب گئتدی. هئچ چاره‌م قالمامیشدی، چیرمالانیب اونون- بونون ائوینده ایشلمه‌لی ‌ایدیم. خالقین ائوینه پالتار یوماغا، ایشلمه‌یه گئدنده سنی ده اؤزومله آپاراردیم..."

بو خاطیره‌لرین آنی‌سی، سریه ننه‌نین مهریبان آما کدرلی اوزو، هئچ واخت حوسئنین بلله‌یینی ترک ائله‌میردی. او، دفعه‌لرجه، دؤنه- دؤنه بو خاطیره‌لری عاغلیندان گئچیرتمیشدی.

داوامی وار...