..... دمیرچی اوغلو کوراوغلویلا دلی‌لرله ساغوللاشیب یولا دوشدو.

بیر آز گئتميشدي بيردن آتي‌نين باشين چكدى قاييتدى،كوراوغلو گؤردو دمیرچی اوغلو گلیر !

ائله فیکیر ائیله دی کی دمیرچی اوغلو قورخوب قاییئدیب دئدی：

اوغول نییه قاییتدین؟

جواب وئردی：

آی آغا ارضروم بیر بؤیوک شهردی،بلکه من گئتدیم تئللى خانمی تاپا بیلمه‌دیم،یا تاپدیم گوجوم چاتیپ گتیره بیلمه‌دیم،اوندا منه سنین تاپشیردیغین نه دیر؟

دمیرچی اوغلونون جوابیندا کوراوغلو گؤرک نه دئییر:

ارضرومون بازارینا_واراندا
ازل ارضرومو آتماغین گرک
گؤردون کی مطلبین باشا وارمادی
عرب آت یالینا یاتماغین گرک

ایگیت گرک میدان آچا دوز دورا
دوشمن قاباغیندا یاغینی بورا
آیاقلاری اوزه‌نگینه برک وورا
ششپری ششپره چاتماغین گرک

ایگیت اولان نئیلر اللینی،یوزو
نامردین داعوادا دؤرد اولار گؤزو
بودور کوراوغلونون،اوغول بیل سؤزو
او تئللى خانیمی تاپماغین گرک.

دمیرچی اوغلو کوراوغلودان آیریلیب،عرب آتی سوروب ارضروما طرف یولا دوشدو. آز گئدیب چوخ گئدیب گلیب یئتیشدی ارضرومون داغلارینا،اؤزو يورغون ،آتى آج . دوشوب آتی گؤیه‌ره‌نتییه بوراخیب اؤزو بولاغین باشیندا دیرسکلندی،بیر آزدان دمیرچی اوغلونو یوخو دوتوپ یاتدی،دوراندا گؤردو هر یانی دومان بورویوب،عرب آتی دا یوخدو ؟!

عرب آت گئتدى اليمدن
عرب آتى من ايستیرم
آيرى دوشموشم ائليمدن
عرب آتى من ايستیرم

بيناسيز هؤرگو هؤرولمز
جراحسیز خسته دیریلمز
باخیرام هئچ ییر گؤرولمز
عرب آتی من ایستیرم.

دمیرچی اوغلو گزدی عرب آتی دوماندان،چیسگیندن،تاپا بیلمه دی،
گؤتوروب تله‌سیک گؤرک نه دئییر：

دونیادا هئچ ایگید یوخسول اولماسین
یوخسوللوق ایگیده یامان آد اولور
هر کسین کی،واری، دؤولتی اولسا
لذت چکر، دهانیندا،داد اولور.

وارلی، کاسیب بو دونیادان کؤچرلر
یاخشینی، یامانی آرار،سئچرلر
وارین اولسا گلیب یئیب ایچرلر
یوخسول اولسان قوهوم، قارداش یاد اولور.

دمیرچی اوغلو،ها اوخویار آروادا
آرتیب دردیم اولدو حددن زیادا
یاخشی آت میننلر قالسا پیادا
داش دوشر باشینا، بیر آرواد اولور.

بیر آز کئچدی، یئل قالخدی، داغلارین باشیندان دومان چکیلیب هریان گؤروندو دمیرچی اوغلو عرب آتی تاپدی، مینیب سوردو، آخشام چاغی اؤزونو ارضروما یئتیردی. بیر قوجا قاری‌یا راست گلیب دئدی:

آی قاری ننه قریبم، منی بیر گئجه لیک قوناق ائیلرسنمی؟

قاری دئدی:

بیزلر قوناغی چوخ سئوه ریک، نییه ائله میرم.

دمیرچی اوغلو دوشوب، آتی تؤیله‌یه چکدی، اؤزوده قاری‌نین ائوینه گلدی.

قاری دمیرچی اوغلونا چؤرک گتیردی. یئمکدن سونرا قاری دئدی:

آی اوغول، بورا نه اوچون گلمیسن؟

دمیرچی اوغلو دئدی :

آی ننه، جعفرپاشانین قیزی تئللی خانمی آپارماغا گلمیشم سؤیله، اونو نئجه گؤره بیلرم؟

قاری دئدی:

آی اوغول، او چوخ آشیق سئور قیزدیر؛ عمارتی‌نین قاباغی پهلوانلار مئیدانیدیر.صاباح بیر ساز گؤتور او مئیدانا چیخ،چال، اوخو اوندا تئللی خانم ائیوانا چیخار، گؤررسن.

دمیرچی اوغلو گئجه قاری‌نین ائوینده یاتدی. صاباح آچیلدی. آتینی قارینین تؤیله سینده قویوب. اؤزوده آشیق پالتاری گئییب، آلتیندان قیلینجین باغلادی. سازی گؤتوروب اؤزونو پهلوانلار مئیدانینا سالدی. پهلوانلار مئدانیندا جعفر پاشا اؤزآداملاری ایله ایلشمیشدیر. دمیرچی اوغلونو گؤروب دئدی:

آشیق، بیر چال اوخو،قولاق آساق، کئفیمیز آچیلسین.
دمیرچی اوغلو گؤرک نه دئدی:

داوامی وار