اولی بورادا...

بئشینجی حیسه

دیل تاریخیمیزی اؤیره‌نمک باخیمین‌دان دا ختای یارادیجی‌لیغی بؤیوک اهمیته مالیک‌دیر. او، جان‌لی دانیشیق
دیلین‌دن چوخ‌لو سؤز و ایفاده‌لری آلیب شئیره گتیرمیش‌دیر. بو سؤزلرین بعضیلری کؤهنل‌سه ده بیر چوخو بو گون ده فونکسیونال‌لیغینی قوروماق‌دادیر.

دؤولت‌چی‌لیک تاریخیمیزده بؤیوک رول اوینایان شاه ایسماییل قودرت‌لی آذربایجان شاعری کیمی ده اؤز دولغون، مزمون‌لو و اؤلمز پوئزییاسی ایله دوغما ادبیاتیمیزی فورما و مزمونجا زنگینلشدیرمیش‌دیر. اونون اور‌یه یاتان طراوت‌لی نغمه و شرقیلری دوغما تورک دیلی شعیر خزینه‌سینه یئنی بیر
تؤهفه‌دیر.

اؤز اولو باباسی شئیخ صفینین میراس قویوب گئتدیی یولو داوام ائتدیره‌ن شاه ایسماییل تکجه شاعر کیمی دئییل، هؤکمدار و دؤولت باش‌چی‌سی کیمی ده آذربایجان دیلینه و دؤولتچیلیینه اوزسیز خیدمتلر گؤسترمیش‌دیر. شاه ایسماییل صفوی دؤولتینی قوردوق‌دان سونرا آذربایجان تورکجه‌سینه رس‌می دؤولت دیلی ایستاتوسو قازاندیرمیش و اؤز دیلینه، ائلینه اولان حؤرمتینی، سئوگی‌سینی عمل‌ده ثبوت ائتمیش‌دیر. شاه ایسماییلین قوردوغو دؤولت‌ده آذربایجان دیلینین دؤولت دیلی اولماسی، خاریجی اؤلکه‌لره بو دیل‌ده رسمی مکتوبلارین یازیلماسی دیلیمیزین اهمیتینی قات-قات آرتیرمیش، عینی زامان‌دا دیلیمیزین چیچکلنیب اینکیشاف ائتمه‌سین‌ده بؤیوک رول اوینامیش‌دیر.

صفوی شاهلاری اؤز آنا دیللرین‌ده یازیب یارادیر، فارس دیلینه اهمیت وئرمیردیلر. قریبه ده اولسا، همین دؤورده فارس دیلی عثمانلیلاردا و اورتا آسییادا داها ایشلک دیل حساب اولونوردو.

بئله کی، عثمانلی سلطانی سلطان سلیم اؤزونو ایرانین افسانوی پادشاهینین نسلین‌دن سایاراق فارسجا دیوان یازیب. شاه ایسماییل ایسه اؤزونو تورکلرین افسانوی پادشاهی افراسیابین نسلین‌دن بیله‌رک تورکجه شئیر یازمیش‌دیر.

عمومیتله، صفوی شاهلاری شعیر و ادبیاتی حمایه ائدیردیلر. بو شاهلارین بعضیلری ایکی دیل‌ده اثر یازان شاعرلر ایدیلر. تورکجه و فارسجا شعیرلرین یازیلماسی اوچون اللرین‌دن گلنی ائدیردیلر.

آردی وار...