گونئی آذربایجانین قاراداغ ماحالیندان اولان آشیق حسین جوانین آنیم گونودور.

Axar.az خبر وئریر کی، او، ۱۹۱۶-جی ایلده اوتی کندین‌ده یوخسول بیر عائله‌ده دونیایا گؤز آچیب. آتاسینین واخت‌سیز اؤلومون‌دن سونرا آناسی زهره بیر یاشلی اوغلو حسینی خلاص ائتمک امیدی ایله اونو قوزئی آذربایجانا گتیریر. حسین یئددی یاشین‌دان موزدورلوق ائدیر. ۱۹۲۷-جی ایلده‌ن ۱۹۳۵-جی ایلدک گؤیچه‌لی آشیق علسگرین قارداشی اوغلو آشیق موسی‌نین شاگیردی اولور.

بو صنعتین سیرلرینی، شفاهی خالق ادبیاتینی درین‌دن اؤیرنیب توی - دویونلرده، ائل شن‌لیکلرین‌ده چیخیش ائدیر. اساس یارادیجی‌لیغینا ایسه ۱۹۴۰-جی ایلده‌ن باشلاییب. اونون ایلک شعرلری "گول آذربایجان»، "اویان، وطنداشیم"، "آنا وطن"، "اوکتیابر" و ب. تبریزده "وطن یولون‌دا" قزئتین‌ده یاییملانیب.
آشیق حسین جوان ۱۹۳۸-جی ایلین ایولون‌دا گونئی آذربایجانا کؤچوب تبریزده یاشاییب. آنجاق بو کؤچ ایسه هئچ ده کؤنول‌لو یوخ، او دورده سووئت رژیمینین گونئی‌لی سویداشلاریمیزا قارشی آمانسیز دپورتاسییا سیاستین‌دن دولایی باش توتور.

آشیق او تایدا ملی - دموکراتیک حرکاتین تلاطمه گلدیی زامان سنگرلری گزیر، سازی و سؤزو ایله فدایلری غلبه‌یه روحلاندیریردی. آذربایجان ملی حکومتی اونون بو فعالیتینی "۲۱ آذر" مدالی ایله تلطیف ائتدی. ۱۹۴۶ - جی ایلین مارتین‌دا تبریزده دولت درام تئاتری تشکیل اولونارکن او، دیرکتور معاوینی وظیفه‌سین‌ده چالیشیر، انقلابی روح‌لو نغمه‌لری ایله چیخیش ائدیر. بورادا آشیقلار آنسامبلی دا یارادیر. آذربایجان دموکرات فیرقه‌سی و ملی حکومت اونا «خالق آرتیستی» فخری آدینی وئریب. ایران‌دا سید جعفر پیشوری حکومتی (آذربایجان دموکرات فیرقه‌سی) مغلوب اولاندان سونرا سووئت آذربایجانینا کؤچ ائد‌ن آشیق حسین جوان یارادیجی‌لیغینی یئنی‌دن داوام ائتدیریب. او، اوچ خالق داستانی یارادیب.

میللی حکومتین سقوطوندان سونرا ۱۹۴۶-جی ایلده M.Maqomayev آدینا آذربایجان دؤولت فیلارمونییاسین‌دا سولیست کیمی چالیشیر. ۱۹۴۸-جی ایلده‌ن قاسم ایسماییلوو (ایندیکی گورانبوی) رایونونون عزیزبیوو کندین‌ده (ایندیکی کهریزلی) یاشاماغا باشلاییب.

آشیق حسین جوان عموم‌اتفاق خالق یارادیجیلیق ائوینین تدبیرلرینده دفعه‌لرله اشتراک ائدیب، «بؤیوک تئاتر»دا چیخیشی حرارتله قارشیلانمیشدی. رسپوبلیکا اؤزفعالیت اینجه‌صنعت فستیوالینین لاورئاتی اولوب، ۱۹۵۳-جو ایلده بیرینجی درجه‌لی دیپلما لاییق گؤرولوب.

مسکوادا آذربایجان ادبیاتی و اینجه‌صنعتی اون‌گونلویونده آشیقلار دسته‌سینین رهبری کیمی "شرف نشانی" اوردنی ایله تلطیف اولونوب.

اونون "آزادلیق ماهنیلاری" (۱۹۵۰)، "آشیغین آرزولاری" (۱۹۵۰)، "شئیرلر" (۱۹۵۳)، "سدف‌لی ساز" (۱۹۵۶)، "قوشمالار" (۱۹۵۹)، "شئیرلر" (۱۹۶۲)، "دانیش تئل‌لی سازیم" (۱۹۶۶)، "ائل آشیغی" (۱۹۷۵)، "باهار کیمی" (۱۹۷۹) کیتابلاری چاپ ائدیلیب.

آشیق حسین جوان ۱۹۸۵-جی ایل نویابرین ۱۴ - ده وفات ائدیب.

آشیق شعرینین بوتون نؤولرین‌ده یازان آشیق جوان اساساً گرایلی و قوشمالارا اوستونلوک وئره‌رک، گونئی آذربایجانین گؤزل‌لیکلرینی، قهرمانلارینی شعرلرین‌ده وصف ائدیب:

گؤزلریم وطنی قم‌لی گؤره‌ن‌ده.
دردیم تزه‌لن‌دی، خیالا دوشدوم.
خالقین ناله‌سین‌دن، خالقین آهین‌دان،
آلیشدیم اودلارا، بو حالا دوشدوم.

جللادلار علین‌ده داغیلیر وطن،
آیریلیر آنالار کؤرپه‌لرین‌دن،
ائلین ناله‌سینی ائشیتدیکجه من،
دولاندیم، محل‌دان محلا دوشدوم.

شئیرلرین‌ده تئز-تئز گونئی آذربایجانین داغلارینی، شهرلرینی قئید ائد‌ن جاوان "قاراداغ" ردیف‌لی قوشماسین‌دا بونلاری یازیر:

تبریز بیر آنادیر، سن ده اوغلوسان،
ائل بیلیر، اورک‌دن اونا باغلی‌سان،
اوغلون ستتارخان‌دان سینه داغ‌لی‌سان،
اونونچون آغاریب باشین قاراداغ.

حسین جاوان گونئی آذربایجان‌دا اولدوغو کیمی قوزئی آذربایجان‌دا دا سئویلیر. او تای‌لی - بو تای‌لی آذربایجانین بیر چوخ آشیقلاری اونون تأثیری ایله شئیرلر یازیب.

ایران‌دا پیشوری حکومتی (آذربایجان دئموکرات فیرقه‌سی) مغلوب اولان‌دان سونرا آذربایجان سسری-یه گلن جاوانین بورادا بیر چوخ شئیر و قوشمالاری مشهور اولوب.