گونئی آذربایجان مدنیت مرکزینین تشکیلاتچی‌لیغی ایله بو ایل سنتیابر آیین‌دا ازمیر شهرینده اینجه‌صنعت فستیوالی کئچیریله‌جک. مقصد گونئی آذربایجانین صنعت اینسانلارینی بیر آرایا توپلاماق، اونلارین یارادیجی‌لیغینی گئنیش کوتله‌یه تقدیم ائتمکدیر.

بو سؤزلری Kult.az-آ مرکزین صدری جمال محمت‌خان‌اوغلو فستیوال حاقیندا معلومات وئررکه‌ن دئییب.

تدبیرین حاضرلیقلارینا باشلانیلدیغینی سؤیله‌یه‌ن محمت‌خانوغلو فستیوالین تخمینی پروگرامینین دا معینلشدیریلدیینی دقته چاتدیریب:

«گونئی آذربایجان مدنیت و صنعت فستیوالی بوتؤولوکده تانینمیش آذربایجان شاعری بولود قاراچورلویا حصر اولوناجاق. فستیوال چرچیوه‌سینده بیر هفته فاصیله ایله ایکی گون موسیقی و رقص نمره‌لری، فوتو، رسم و هیکل‌‍تراشلیق سرگی‌سی، فیلم و رژیسورلارین تقدیمات گئجه‌لری تشکیل اولوناجاق. شعر و یارادیجیلیق گئجه‌لرینین کئچیریلمه‌سی ده نظرده توتولوب. گونئی آذربایجانین تانینمیش شاعری بولود قاراچورلونون و صمد بهرنگینین خاطره‌سی یاد ائدیله‌جک، اونلارین اثرلری سس‌لنه‌جک. همچینین، «گونئی آذربایجان‌دا آشیق صنعتی» آدلی گئجه‌ده بیر-بیریندن ماراقلی سازلی-سؤزلو صحبتلر اولاجاق. اشتراکچیلار بورادا، همچینین، گونئی آذربایجان یئمکلری ایله تانیش اولماق ایمکانی قازاناجاق».

مرکزین رهبری بیلدیریب کی، بئله بیر فستیوال ایلک دفعه تشکیل اولونور:

«تدبیر گونئی آذربایجان مدنیتینین تبلیغی باخیمیندان اهمیتلیدیر. یاخین گونلرده فستیوالین تشکیلات کمیته‌سی یارادیلاجاق. بو کمیته‌ده تمثیل اولونماق ایسته‌یه‌نلر مرکزه مراجعت ائده بیلرلر.

دونیادا ایلک دفعه اولاراق گونئی آذربایجان تورکلری آدینا تشکیل اولونان اینجه‌صنعت فستیوالینین عرصه‌یه گلمه‌سی اوچون هر کسین دستیی چوخ اهمیتلیدیر».