۵.۲ هکتار اراضی‌سی اولان و شهرین مرکزینده یئرلشه‌ن گولوستان باغی تبریزین، عمومی‌لیکده ایسه ایرانین ان قدیم شهرداخلی پارکلاریندان بیری ساییلیر.

Kult.az خبر وئریر کی، ۱۹۲۹-جو ایله کیمی شهرین "گجیل" قبیریستانلیغی کیمی تانینان بؤلگه تبریزین او واختکی ضیالی و مترقی بلدیه باشچی‌سی محمدعلی تربیتین تشببوسو ایله پارکا چئوریلیب.

بیر سیرا تاریخی قایناقلاردا حاضیرکی گولوستان باغینین عربلرین آذربایجانی اشغالیندان سونرا عباسی خلیفه‌سی هارون الرشیدین حیات یولداشی زبیده خاتونون تبریزه سفری زمانی سالیندیغی یازیلیب.

۲۰-جی عصرین اوللرینده یئنی‌دن پارک کیمی استفاده‌یه وئریله‌ن گولوستان باغی بیر چوخ سیاسی و اجتماعی حادثه‌لرین شاهدی اولوب.

بورادا آذربایجان و تبریزین سیاسی، اجتماعی و مدنی حیاتیندا اهمیتلی رول اوینایان ییغینجاقلار، میتینگلر کئچیریلیب.

۱۹۶۱-جی ایلده ایراندا قاسترول سفرده اولان رشید بهبودوون گولوستان باغین‌داکی کنسرتی یاشلی تبریزلیلرین یادیندا قالان ان اهمیت‌لی مدنی حادثه‌لردن بیریدیر.

بونونلا یاناشی، گولوستان باغی آذربایجان‌لیلار اوچون بیر نئچه آغریلی-آجیلی حادثه‌نین ده شاهدی اولوب.

۱۹۴۶-جی ایل اوکتیابرین ۱۲-ده جنوبی آذربایجان میللی حکومتی دئوریلدیکدن سونرا تبریزدن چیخماغی قبول ائتمه‌ین میللی حکومتین باش پروکورورو فریدون ابراهیمی ۲۲ مای ۱۹۴۶-جی ایلده گولوستان باغیندا دار آغاجیندان آسیلاراق اعدام ائدیلیب.

گولوستان باغی ایندی اولکی قدر طراوتلی و اورک آچان اولماسا دا، یئنه ده تبریزلیلرین، خصوصیله باغین تاریخینی بیله‌ن یاشلی نسلین ان سئویملی، خاطره‌لرله زنگین استراحت یئرلریندن اؤنده گلنی ساییلیر.

گولوستان باغی تبریزین سیمووللاریندان بیرینه چئوریلدیی اوچون اونون باره‌سینده شعرلر یازیلیب، ماهنیلار اوخونوب.

خصوصاً ۱۹۴۶-جی ایلدن سونرا گونئی آذربایجاندان چیخماغا مجبور اولان بیر چوخ صنعت‌چیلر، شاعر و یازیچیلار اثرلرینده دائما گولوستان باغی حاقیندا یازیبلار.

۱۹۴۶-جی ایلده گنج یاشیندا گونئی آذربایجاندان باکییا مهاجرت ائتمه‌یه مجبور اولان شاعره مدینه گولگون مشهور "تبریزیم" شعرینده ده گولوستان باغی باره‌سینده یازیب:

گولوستان باغینین سئیرینه گلیم،
لاله یاماجیندا بیر ده دینجلیم.
اؤتن گونلریمه یئتیشمز الیم،
دوشوم هئچ اولماسا ایزینه تبریز.