جنوبی آذربایجان ادبیاتیندا امضاسی ایله تانینان شاعر و ژورنالیست ائلدار مغانلی بو ساحهده اؤز سؤزونو دئیهن ادبی اینسانلاردان بیریدیر.
Kult.az خبر وئریر کی، او، ۱۹۶۰ - جی ایلین آپرلین ۲۳-او مغانین علیرضا آباد (اسلاماباد) کندینده دونیایا گؤز آچیب. ۲۰ یاشیندا پارساباد یاخینلیغیندا یئرلشن اجیرلی کندینده، سونرا تبریزده، ایندی ایسه تهراندا یاشاییب چالیشیر.
تحصیلینی سوسیولوگییا علملری و شهر پلانلاشدیرما علمی اوزره آلسا دا، ادبی ایجتیماعیتیمیزده داها چوخ بیر شاعر و ژورنالیست کیمی تانینیر.
ادبیاتا انقلابدان سونرا گلن شاعرین ایلک شعیرلری تبریزده نشر اولونان "فروغ آزادی" قزئتینده و دیگر نشریاتلاردا چاپ اولوب.
۱۹۸۴-جو ایلده بیر نئچه ایل تبریزده اوستاد یحیی شیدانین باشچیلیغی ایله نشر اولان "آذری صحیفهسی"نده اونونلا امکداشلیق ائدن شاعر حاجی هریسلی، میانالی علیرضا، ناصر داواران، حسن ایلدیریم، زهرا یاسمن، شیرین سرابلی و کماله نوشادلا امکداشلیق ائتمکله بو قزئتین اؤزل صحیفهلری اولان "اوشاقلار باغچاسی"، "جوانلار"، "آشیقلار" و "قادینلار"بؤلومونو حاضرلاییب.
۱۹۹۰-جی ایل شعیرلرینین بیر حیصهسی "حیات یوللاریندا" آدیندا تهراندا "مینا" نشریاتی طرفیندن کیتاب شکلینده چاپ ائدیلیب. ائلدار مغانلی ادبی - مدنی فعالیتلرینده همیشه آذربایجان ادبیات و اینجهصنعت نمایندهلرینین یوبیلی و تدبیرلرینده یاخیندان اشتراک ائدیب، بو تدبیرلرین ترتیب ائدیلمهسینده الیندن گلنی اسیرگهمهییب.
حاضردا ۲۰۱۱-جی ایلدن فعالیته باشلایان «ایشیق - آذربایجان ادبیات و اینجهصنعت سایتی"نین و "ایشیق" اوچ آیلیق ژورنالینین باش یازاری کیمی فعالیت گؤستریر. شعیرلری و مقالهلری اینترنتده فعالیت گؤسترن ادبیات صحیفهلرینده درج اولونور.
ائلدار مغانلی اوزون ایللر "ساهیر ادبی - مدنی درنیی"نین ایداره هئیتی عضوو کیمی چالیشیب. بو گون ده بو درنیین فعالیتلرینده فعال اشتراک ائدن عضولریندندیر.
بیر اورک وطن
ندندی گؤزلرینین گوزگوسونده چن گؤرونور؟
بولودلومو اوریین، یوخسا چن ندن گؤرونور؟
یاناقلاریندا سولوب شعیریمین قیزیل چیچیی
بنؤوشه بنده دوشوبمو کی، یاسمن گؤرونور؟
جوموبدو دالغالارین قوینوندا بولود لپهلر
دنیزله فیرتینا چاخناشمادا نه تن گؤرونور
چیچک - چیچک آچیلیر گؤزلرینده میرواریلر
قهر یاغیر نئجه ده داملا-داملا دن گؤرونور!
پاییزلانیب سینهن اوستونده ایلک بهار هوهسی
قارانقوشلار آرزولو رؤیالارین پرهن گؤرونور.
داغیلدی کؤنلوم ائوینده ایشیق بونؤورهلری
گؤرهنده گؤزلرینین گوزگوسونده چن گؤرونور.
یئنه گونشلییه اوچ، قوی باخیشلارین آچسین
سیخیلما، قونماغینا بیر اورک وطن گؤرونور.