اردبیل شهریندن اولان یازیچی، شاعر، ژورنالیست و مدنی فعال مژگان صیامی اردبیلی آپرلین ۶-دا دنیاسینی دییشیب.

Kult.az خبر وئریر کی، بو باره‌ده اونون یاخینلاری معلومات یاییب.

۱۹۷۱-جی ایلده آنادان اولان مژگان صیامی اردبیلی آذربایجان و فارس دیللرینده نشر اولونان "سارای" درگیسینین مسئولو اولوب.

ایلک، اورتا و عالی تحصیلینی دوغما شهرینده آلان خانیم فعال، مدنی فعالیتلری ایله یاناشی، اردبیل مکتبلرینده ادبیات معلمی کیمی ده چالیشیب.

او، ایران‌دا آذربایجان دیلینین قورونماسی و انکشاف ائتدیریلمه‌سی اوچون فعالیت گؤسترن آز سایلی خانیم فعاللاردان اولوب.

خانیم یازیچی "سون سئانس"، "اردبیل‌نامه"، "یاشامادیم قوسدوم" کیمی شعر و حکایه‌لر، هابئله فارس دیلینده بیر نئچه کتابین مؤلفیدیر.

بونونلا یاناشی او، بیر چوخ رمان، حکایه و ادبی-تاریخی اثرلری فارس دیلیندن آذربایجان دیلینه ترجمه ائدیب.

اونون ترجمه ائتدیی اثرلر آراسیندا ابراهیم دارابی‌نین "ساوالانین گؤز یاشلاری" و محمدرضا بایرامینین "یاشیل باغین اؤلولری" داها مشهوردور.

مژگان صیامی اردبیلی دؤوری مطبوعاتدا مختلف مضمونلو یازیلاری ایله چیخیش ائتمکله یاناشی، سیاسی، اجتماعی-مدنی ساحه‌ده ده فعالیت گؤستریب و قادینلارین حقوقلارینین مدافعه‌سی ایله مشغول اولوب.

دینج فعالیتلرینه گؤره حبس ائدیله‌ن خانیم ژورنالیستین ایکی دفعه حیاتینا سوء-قصد اولوب، اوزون مدت حبسده قالیب.

او، ۲۰۱۷-جی ایلده دینی سیاستدن آییراجاغی شعاری ایله ایراندا پرزیدنت سئچکیلرینه نامزدلیینی ایر‌لی سوردوکدن سونرا تهلوکه‌سیزلیک قوه‌لرینین هدفینه چئوریلیب.