دونیا کینوسونون اینجیلری سیراسینا داخیل اولان «کاریب دنیزینین قولدورلاری» فیلم-سرییاسینا چوخوموز باخمیشیق. فیلم سسناریستلر تئد ائللیوت و تئرری روسسیو طرفیندن یارادیلیب، باش رول ایفاچیسی ایسه مشهور آکتیور جوننی دپپدیر. فیلم او قدر پوپولیار اولوب کی، دونیانین هر یئرینده بو پئرسوناژ چوخ سئویلیب. لاکین چوخ آز آدام بیلیر کی، کاپیتان چئک سرچه کیمی تانینان بو پئرسوناژین پریتوتیپی وار و اونو آوروپادا یوسیف ریس (تورک-مسلمان دنیزچی) کیمی ده تانیییبلار.
«تورک-مسلمانا دونن کریستیان» اولان چئک ۱۵۵۳-جو ایلده اینگیلترهده کئنتین فاورسهام قصبهسینده آنادان اولوب. گنج یاشلاریندا بالیقچی اولان جک داها بؤیوک ادعالار اوغروندا دنیز قولدورلارینا قوشولوب. بونا سبب اینگیلتره-اسپانییا آراسیندا دنیز حاکمیتی اوغروندا مباریزه ایدی.
اینگیلتره کرالیچاسی ۱-جی الیزابت اسپانییا کرالی ۲-جی فیلیپین دنیز آرماداسینا مانع اولاجاق قولدور گمیلرینین یارادیلماسی قرارینا گلیر و دوشمن گمیلرینی تالاماق و قورخوتماق حقوقو وئرهن خصوصی لیسئنزییا تاسیس ائدیر. اسپان گمیلریندن الده ائدیلن گلیرین یاریسی کرالیچایا چاتیردی و بو «لیسئنزییالی دنیز قولدورلوغو» اسپان-اینگیلیس دوستلوق مناسیبتی قورولانا قدر داوام ائتدی. دوستلوق قورولاندا خصوصی لیسئنزییالار لغو ائدیلدی و دنیز قولدورلاری قانوندانکنار اعلان اولوندو. لاکین جئک و دستهسی آسان گلیر منبعییندن ال چکمک ایستهمیردی و اونلار اسپان گمیلری ایله یاناشی، آوروپانین دیگر گمیلرینی ده اله کئچیرمهیه باشلادیلار و اؤزلرینه کیفایت قدر دوشمن قازاندیلار.
آوروپانین اونا قارشی چیخماسین گؤرهن جک ۱۶۰۶-جی ایلین آوگوستوندا تونیسین عثمانلی حاکمی قارا عثمان ایله مقاویله باغلاییر. بو مقاویله اساسیندا دا اسلام دینینی قبول ائدیب، عثمانلی وطنداشی اولور و اؤزونه گوجلو آرخا الده ائدیر. اینگیلیس کرالیندان عفو ایستهسه ده، بونا یوخ جاوابی آلاندان سونرا تورک پیرات کیمی بوتون آوروپانین قورخولو یوخوسونا چئوریلیر. شخصی ثروتی ۲ میلیون فونت-ایسترلینگه چاتیر.
۱۶۰۸-جی ایلده جک سرچه یوسیف رئیس اولاراق اونونلا بیرلیکده اولان اینگیلیس و هوللاند دنیز قولدورلارینا مسلمان اولماغی تکلیف ائدیر و اونلار هامیلیقلا اسلامی قبول ائدیرلر. اونون آدی «کاپیتان یوسوف آسفور» کیمی ده منبعلرده قید ائدیلیر («آسفور» عربجه «سرچه» دئمکدیر).
آرتیق اونلار قولدور و یا موزدلو دنیز دؤیوشچوسو دئییل، «کافیر خاچپرستلره هجوم ائدن دؤیوشکن مسلمان تورک دنیزچیلر» حساب اولونوردولار. یوسیف رئیس ائله همین ایلده اسلامی قبول ائتمیش یاسمن آدلی سیجیلییالی بیر قادینلا ائولنیر.
مشهور پیرات ۱۶۱۲-جی ایلده، ۶۵ یاشیندا دنیز قولدورلوغونو ترک ائدرک گنجلره دنیز و آرتیللئرییا باجاریقلارینی اؤیرتمهیه باشلاییر. عمرونون قالان حیصهسینی تونیسده دبدبهلی مالیکانهسینده یاشاییر و ۷۰ یاشیندا، احتیمال ائدیلیر کی، وبا خستهلییندن اؤلور.
دئییلنه گؤره، تورک کیمی گئیینیر، مطبخی تورک یئمکلری ایله زنگین اولوردو. ایچکی ایچمز، واختیندا دینی عبادتینی ائدردی.
تورک اولدوغونو هر زامان گؤسترمک مقصدیله ساغ قولاغینا «آی-اولدوز»حکک ائدیلمیش سیرغا تاخاردی. حتی فیلمده بئله رژیسسورلار بونو گیزلتمهمیش و آچیق شکیلده صحنهلشدیرمیشلر.
جک سرچهنین حکایهسی ۱۶۱۲-جی ایلده «تورک اولموش کریستیان» آدلی پیئس یازان اینگیلیس دراماتورگ روبرت دابورن سایهسینده بو گونه قدر گلیب چاتمیشدیر.