گونئی‌لی یازیچی فریبا وفینین Kult.az-آ مصاحیبه‌سی:

- اؤنجه دئیک کی، گونئی آذربایجانین دونیاجا اونلو اسملریندن فریبا وفینی آذربایجانیمیزدا سلاملاماق، سویداشیمیزلا دوغما دیلیمیزده فکیرلرینی بؤلوشمک سون‌سوز ممنونلوق حسی یاشادیر اینسانا. وطنه خوش گلمیسینیز! بو سیزین باکی‌یا ایلک گلیشینیزدیر، یا اول ده بورادا اولموسونوز؟

- خوش گؤردوک، چوخ ساغ اولون. بو، منیم باکییا آرتیق ۴-جو سفریم‌دیر. آخیرینجی دفعه تخمیناً ۱۰ ایل بوندان اول گلدیم. او واختدان بو یانا شهر چوخ دییشیلیب، داها دا معاصرلشیب. حتی بیلدییم قدر، حاضردا آذربایجان ایقلیم دییشیک‌لییی ایله باغلی مسئله‌لرین حلینده ده آپاریجی رول اویناییر. کوپ۲۹ کیمی بین‌الخالق لاییحه‌لره ائو صاحب‌لییی ائدیر. باکی او قدر سرعتله انکشاف ائدیب کی، آوروپا شهرلریندن بیری کیمی گؤرونور.

- حاضردا آلمانییادا یاشاییرسینیز. دونیانین بیر چوخ اؤلکه‌سین‌ده اولموسونوز. آذربایجانین سیزین اوچون داشیدیغی ماهیت، کسب ائتدیی اهمیت ندن عبارت‌دیر؟

- آذربایجان‌دا اولماغیم‌دان چوخ شادام. دوزدور، بیر چوخ اؤلکه‌ده اولسام دا، آذربایجانی دیگرلرین‌دن فرقلندیره‌ن اساس خصوصیت سؤزسوز کی، دوغمالیق حسی‌دیر. بیلدیینیز کیمی، ایران‌دا آذربایجان‌لیلارین دوغما دیلده تحصیل آلما حقوقو اولمادیغیندان و قایدالارا اویغون اولاراق فارس دیلی آپاریجی رول اوینادیغین‌دان، بورادا هر کسین اؤز دیلین‌ده دانیشماغی منیم اوچون سئویندیریجی حال‌دیر. همچینین کتاب سرگی‌سینده ده شاهد اولدوغوم گنج اوخوجولارین کیتابیما اولان بؤیوک رغبتی و دوغما مناسیبتی منی چوخ سئویندیردی.

- مصاحیبه‌لرینیزین بیرینده دئمیشدینیز کی، آذربایجانجا دوشونوب، فارسجا یازیرام. دیگر مصاحیبه‌لرینیزده ده دفعه‌لرله دیل کیمی ایستراتژی بیر مسئله‌یه حساس‌لیقلا یاناشمانیزین شاهدی اولوروق. دونن ۱۰-جو بین‌الخالق کیتاب سرگی‌سینده ده اوخوجولارلا گؤروشده بونو قید ائتدینیز...

- بیلیرسیز، دیل چوخ حساس بیر مسئله‌دیر. هر بیر انسانین دیلی اونا عزیزدیر، آنجاق یازیچی اوچون دیل مسئله‌سی داها درین اهمیته مالیکدیر. بیر چوخ یازیچییا گؤره دیل یازما آلتی اولسا دا، منجه، دیل آلت دئییل، دیل یازیچینین دونیاسی‌دیر. اونون واسطه‌سی ایله کلمه‌لر حیات تاپیر. داها اول‌ده قید ائتدییم کیمی، من دوغما دیلده دوشوندویومدن و داخلی سس‌ین آنا دیلیم‌ده اولماسیندان دولایی، آذربایجان دیلی منیم اوچون داها دوغمادیر.

- ایران‌دا قادینلارا قارشی اولان بوتون پروبلملی یاناشمانی نظره آلساق، قادینلارین ادبیاتدا فعالیتینی نئجه دیرلندیریرسینیز؟

- انقلاب‌دان سونراکی دورلرده ایستر بوتون ایران ادبیاتیندا، ایسترسه ده گونئی ادبیاتیندا خانیم یازارلارین سایی چوخ ایدی. حتی ائله بیر دور وار ایدی کی، قادین یازارلارین سایی کیشی یازارلاری اوسته‌لمیشدی. ایندی ده کتابلاریم ایران‌دا و باشقا اؤلکه‌لرده نشر اولونور. آنجاق تأسف کی، دیل مسئله‌سی ایله باغلی آذربایجانجا یازیلان یازیلارین اوخوجو کوتله‌سی داها آزدیر. بیلدیینیز کیمی، گونئی‌لی سویداشلاریمیزین بیر چوخو معاصر آذربایجانین گرافیکاسی ایله تانیش دئییللر. بو سبب‌دن ده فارسجا یازیلار اوستونلوک تشکیل ائدیر.

- سیزجه، ایرانین معاصر و کلاسیک ادبیاتین‌دا قادین هانسی یئرده‌دیر؟

- دوشونموره‌م کی، قادینی هر هان‌سی بیر یئره قویماق اولار و یا لازیم‌دیر. قادین دنیاسی اؤز-اؤزلویونده مرکب و قاریشیق، عینی زمان‌دا ضدیتلی عالم‌دیر. من عادتاً یاشادیغیم و گؤردوکلریمی یازیرام. شرایط‌دن آسیلی اولاراق، قادینلارین ان خیردا حقوقلاری الده ائتمک اوچون بئله مباریزه آپاریدیغی بیر جمعیت‌ده یاشاماق تجروبه‌م‌دن دولایی، دئیه بیلره‌م کی، قادینین یئرینی بیر کلمه ایله ایفاده ائتمه‌لی اولسام، یقین کی بو، «مباریزه» سؤزو اولاردی.

- عادتاً سیزین قهرمانلارینیز رئال گئرچکلیکلردن، حیاتین ایچیندن بویلانان قادینلاردیر. قلمه آلدیقلارینیز آغریسی، آجی‌سی، سئوینجی، حسلری، دویغولاری، پروبلملری ایله رول دونوندان اوزاق، قادینلارین رئال یاشانتیلارینین بدیعی انعکاسی‌دیر. ضریف گؤروندویو قدر گوچلو یارادیلان بیر کسیمین سسی اولماق نئجه حس‌دیر.

- قادینلار نه قدر ضریف اولسا دا، گوجلو مخلوقلاردیر. اوللر ادبیات‌دا داها چوخ ایکی فورمادا قادین اوبرازی یارادیلیردی: یا ملک - فداکار، هر شئی‌دن کئچن، مقدس، یا دا عکسی – شیطان، داها قارانلیق قادین. بیر قادین کیمی یارادیجیلیق فعالیتی ایله مشغول اولماغیمین اساس سببلریندن بیری بودور کی، هئچ بیر کیشی بو قدر مرکب قادین دنیاسینی، بیر قادینین حس‌ینی اونون قدر درک ائدیب، تصویر ائتمک گوجونه مالک دئییل.

- مصاحیبه‌لرینیزین بیرینده بیلدیرمیسینیز کی، ضیالیلار و یازیچیلار جمعیت‌ده تأثیر گوجونه مالک دئییللر. بیر چوخ اؤلکه‌ده ایسه وضعیت عکسینه‌دیر. سیزجه، بو حال ایران‌دا بئله‌دیر، یا بوتون دونیادا؟ بونون سببلری ندیر؟

- آها، بیلیرم هانسی مصاحیبه‌نی نظرده توتورسونوز. اصلینده یازیدا باشلیق بیر آز فرق‌لی آنلاشیلیب. اورادا قید ائتمیشدیم کی، ایران‌دا موجود اقتصادی وضعیتله علاقدار کتاب نشرلرینین ساییندا کسکین آزالما مشاهده اولونور. طبیعی کی، بو، کتابین اوخوجو کوتله‌سینه چاتماسینا دا تأثیر ائدیر. بئله‌لیکله، کتابلارین و دولایی یوللا ضیالیلارین دا اینسانلارا تأثیر امکانلاری آزالیر.

- قوزی ادبیاتی ایله باغلی نه دوشونورسونوز؟ تانیدیغینیز ایسیملر وارمی؟

- فارس دیلین‌ده بیر نئچه قوزی ادبیاتی نمونه‌سی ایله تانیش اولموشام. بو کتابلار فارس دیلینه ترجمه اولوندوغوندان، بیر آز دا ترجمه‌چینین استعدادی ایله باغلی مسئله‌دیر فکریمجه. آنجاق بونا باخمایاراق، حاضردا خاطرلاماسام دا، بیر نئچه یازیلاری، خصوصیله ده ناغیللارلا باغلی کیتابلاری بیندییمی دئیه بیلره‌م.

- گله‌جک پلانلارینیز و یارادیجی‌لیق فعالیتینیز باره‌ده نه دئمک ایستیرسینیز؟

- یارادیجیلیغیما داوام ائتمیی پلانلاییرام. یاخین گله‌جکده نوبتی کتابیم ایشیق اوزو گؤره‌جک. بو کتاب آلمانجا چیخاجاق و چوخ گمان کی، فارس دیلینده ده اوخوجولارا تقدیم اولوناجاق.

- قاراباغ ظفرینه مناسیبتینیز باره‌ده نه دئیه بیلرسینیز؟ بو بؤیوک غلبه سیزی سئویندیریرمی؟

- من آچیغی قاراباغ مناقیشه‌سی ایله باغلی ائله ده معلوماتلی دئییلدیم. آنجاق بورا گلدیکدن سونرا تزه-تزه بو باره‌ده خبردار اولموشام. حتی یولدا ماشینا میندیکده بو حاقدا اولان حکایه‌لری ائشیدیرم. ایراندا بیزیم قاراباغ حاقین‌دا ائله ده معلوماتمیز یوخدور. بورا گلدیکدن سونرا نیسبتاً خبردار اولورام باش وئره‌ن حادثه‌لردن. قاراباغدا گئدن دؤیوشلر، وئریلن شهیدلر، حتی «آنا هارایی» عابده‌سی، خوجالیدا باش وئرنلر حاقیندا و س. بو گلیشیم‌ده اؤیرنمیشه‌م. آرزو ائدردیم کی، باکی‌دا داها چوخ غالیب، بو حاق‌دا داها یاخیندان تانیش اولوم.