بو گون عوض ائدیلمز کینو آکتیورو مرحوم جیحون میرزایئوین دوغوم گونودور

Kult.az خبر وئریر کی، جیحون میرزایئو ۹ آپرئل ۱۹۴۶-جی ایلده آغدامین آبدال-گولاب‌لی کندین‌ده آنادان اولوب.

۳۰ ایل اول جیحون میرزایئوین آدی چکیلنده ایلک اولاراق «اؤگی آنا» فیل‌می و بالاجا اسماعیل یادا دوشوردو. او، اکران قهرمانینی ائله گؤزل و ایناندیریجی یاراتمیشدی کی، باخانلار بو اوشاق‌داکی استعدادا حیران‌لیقلارینی گیزلتمیردیلر. ۹۰-جی ایللر نسلی اوچون ایسه «جیحون میرزایئو» آدی «فریاد» فیلمی ایله برابر چکیلیر. ایندیکی نسیلین یادداشیندا او، آرتیق بؤیویه‌رک دوغما تورپاقلارینی قوروماغا گئدن اسماعیل کیمی یاددا قالیب. بوتون حاللاردا جیحون میرزایئو ایکی اپوخانی بیر-بیرینه باغلایا بیلن صنعتکار سایماق اولار.

آذربایجان دولت اینجه‌صنعت اینستیتوتونون رژیسورلوق فاکولته‌سینی بیتیریب. مسکوادا دا تحصیل آلیب. اونون ۴۸ ایللیک عمرونون ۳۵ ایله یاخینی کینو ایله باغلی اولوب.

لاپ ایلک فیلمی ملی فیلملرین اینجیلریندن ساییلان «گؤروش» فیلمی اولوب. شیخلینین اوتاق‌دا اوشاقلاری «وئرمیر، نئجه یعنی وئرمیر» دئیه قووما صحنه‌سینی خاطرلاییرسینزمی؟ همین آن اکران‌دا عکس اولونان ۱۱ یاش‌لی جیحون‌دور. ۱۲ یاشین‌دا ایسه ایسه «اؤگی آنا»یا دعوت آلمیشدی. اسماعیل اوبرازی اونون اوچون بؤیوک کینویا گئدن یوللاری تایباتای آچدی.

جیحون میرزایئو کینوستودییادا مختلف پئشه‌لرده چالیشیب. آسیستنت ده اولوب، رژیسور کمک‌چی‌سی ده ایشله‌ییب، آکتیورلوق دا ائدیب، اوسته‌لیک رژیسور کیمی فیلملر ده چکیب. «موزالان» ساتیریک کینوژورنالی اوچون سوژئتلر چکیب. «موزالان»این بدیعی رهبری اولوب.

جیحون میرزایئو هم ده گوجلو پارودیاچی‌لیق قابیلیتینه مالیک اولوب. بئله کی، او، بیر دفعه صحبت ائتدیی آدامین سسینی، دانیشیق فورماسینی او دقیقه یامسیلاماغی باجاریرمیش. حتی «موزالان»ین باشلیغیندا سس‌لنن ویزیلتی سسی ده اونا مخصوص اولوب.

واقیف مصطفی‌یئوله بیرگه چکدیکلری «بیین اوغورلانماسی» کینوکومئدییاسی ایسه کینو تارخیمیزده حیرت آمیز پوپولیارلیق قازانان فیلم اولوب.

جیحون و لیدییا میرزایئولر ۱۹۷۳-جو ایلده عائله قوروبلار و جمیله آدلی بیر قیزلاری دنیایا گلیب. لیدییا میرزایئوا عدلیه سیستمین‌ده ایشله‌ییب، باش عدلیه مشاویری اولوب

جیحون میرزایئوین سون قورولوش وئردیی فیلمی «فریاد» اولوب. اؤزو بو فیلمینی گؤره بیلمه‌دی. آمان‌سیز اؤلوم اونا امکان وئرمه‌دی کی، هئچ اولماسا فیلمین پرمیراسین‌دا اشتراک ائتسین. ایستودییادا چکیلیش واختی اؤزونو پیس حس ائد‌ن جئیهون ائوه گوجله چاتدیریلیب. همین گون جیحون میرزایئو «فریاد» فیلمی حاقین‌دا حاضرلاناجاق تلویزییا پروگرامین‌دا اشتراک ائتمه‌لی ایدی. اما ایکینجی دفعه کئچیردیی اینسولت اونون اؤلومونه سبب اولدو.

نه فیلمین سونونو، نه ده ۴۷ یاشینی گؤره بیله‌ن آکتیور اؤز قالیبیتینی «فریاد»این تیمسالین‌دا سئیر ائده بیلمه‌دی.

جیحون میرزایئو ۱۹۹۳-جو ایل مارتین ۵-ده (۴۷ یاشینین تمامینا ۱ آی قالمیش) وفات ائتدی. جیحون میرزایئو حیات یولداشی لیدییا میرزایئوا ۱۱ ایون ۲۰۱۵-جی ایل تاریخین‌ده دنیاسینی دییشیب.