آوروپادا ناتو-نون متفق قوه‌لرینین عالی باش کوماندانی آلکسوس گرینکویچ آلیانس عضوو اولان اؤلکه‌لردن بیرینه روسیانین هجومو باش وئرجه‌یی تقدیرده حیاتا کئچیریله‌جک یئنی فعالیت پلانینی تقدیم ائدیب.

Axar.az خبر وئریر کی، بو باره‌ده «بیلد» معلومات یاییب.

قید اولونور کی، «غلبه نظریه‌سی» آدلانان کونسپسیا دشمنین اوچ مرحله‌ده دارماداغین ائدیلمه‌سینی نظرده توتور.

بیرینجی مرحله - «قارشیسینی آلماق» آدلانیر. بو مرحله‌ده ناتو قوه‌لری ایلکین هجومو دایاندیرمالیدیر. اگر قارشی طرف ایر‌لیله‌مه‌یه داوام ائدرسه، آلیانس ایکینجی مرحله‌یه — «ضربه‌نی ضعیفلتمک» مرحله‌سینه کئچه‌جک. بو مرحله‌نین مقصدی هجوم ائد‌ن قوشونلاری داها دا ایر‌لیله‌مک امکانیندان محروم ائتمکدیر.

اوچونجو مرحله — «دارماداغین ائتمک» — تکجه هجوم ائد‌ن بؤلمه‌لرین دئییل، هم ده اونلارین فعالیتینی تامین ائد‌ن بوتون حربی سیستمین محو ائدیلمه‌سینی نظرده توتور. بونون اوچون ناتو تجهیزات یوللارینی کسمه‌یی، اداره‌ائتمه سیستملرینی سیرادان چیخارماغی و هجوم ائد‌ن قوشونلاری دؤیوش قابلیتیندن محروم ائتمه‌یی پلانلاشدیریر.

وارشاوادا کئچیریله‌ن تهلوکه‌سیزلیک فوروموندا چیخیش ائد‌ن گرینکویچ بیلدیریب کی، ناتو بو کنسپسیا اوزرینده آرتیق بیر نئچه ایلدیر ایشله‌ییر. لاکن سون حادثه‌لری نظره آلان آلیانس رهبرلیی کنسپسیانی ایلک دفعه اجتماعیته آچیقلاماق قرارینا گلیب.