هیندیستانین ان زنگین عائله‌سی اولان آمبانیلر ثروتلری ایله انشا ائتدیکلری «وانتارا وحشی طبیعت کراللیغی» لایحه‌سی سببیله استنتاقا جلب اولونوب.

Axar.az خبر وئریر کی، هیندیستان عالی محکمه‌سی اؤلکه‌نین ان وارلی ایش آدامی موکش آمبانینین رهبرلیک ائتدیی «رلیانس فوونداسیون» خیرییه فوندو طرفیندن اداره اولونان لایحه ایله باغلی مستقل آراشدیرما آپاریلماسی باره‌ده قرار قبول ائدیب.

محکمه پارکداکی حیوانلارین قانونسوز یوللا الده ائدیلمه‌سی، اونلارا پیس رفتار ائدیلمه‌سی و اوبیکتین هیندیستانین وحشی طبیعتی محافظه قانونونا اویغونلوغو ایله باغلی ادعالاری آراشدیراجاق.

استنتاق زمانی خصوصیله فیللرین هانسی اصوللارلا الده ائدیلدیی، اونلارین پئرفورمانس مقصدیله استفاده اولونوب-اولونمادیغی آراشدیریلاجاق.

لایحه آمبانی عائله‌سینین ان پرستیژلی اینوستیسیالاریندان بیری کیمی تانینیر. پارکین رسمی سایتیندا یئر آلان معلوماتا گؤره، بورادا مینلرله حیوان خلاص ائدیلیب، همچینین دنیانین ان بؤیوک فیل خسته‌خاناسی تیکیلیب.

اؤتن ایل میلیونلارلا دلارا باشا گلن دبدبه‌لی توی مراسمی ایله گونده‌مه گلن آنانت آمبانی، توی اؤنجه‌سی شنلیکلرین بیر قیسمینی ده محض وانتارادا تشکیل ائتمیشدی.