گوجلو ارمنستان پارتیاسینین لیدری، ائو حبسینده اولان ایش آدامی ساموئل کاراپتیان ایروانین آزادلیق میدانین‌دا کئچیریله‌ن میتینگ اشتراکچیلارینا گؤندردیی ویدئو مراجعتینده حاکمیته گلجه‌یی حال‌دا ۳۰۰ مین ایش یئری یاراداجاغینی، روسیا ایله استراتژی اتفاقی برپا ائدجه‌یینی، دیاسپورا ایله علاقه‌لری گوجلندیرجه‌یینی، کلیسه‌نین رولونو یئنی‌دن آرتیراجاغینی وعد ائدیب.

Axar.az خبر وئریر کی، بو سؤزلری پولیتولوق ائلخان شاهین‌اوغلو قید ائدیب.

«ساموئل کاراپتیان باش ناظیر نیکول پاشینیانین «مخالفت حاکمیته گلرسه، سنتیابر آییندا آذربایجانلا محاربه باشلایاجاق» تئزیسینه بئله جواب وئریب کی، او محاربه‌یه باشلاماق فکرینده دئییل.

بونا باخمایاراق، کاراپتیان مراجعتینده آذربایجانلا صلح قوروجولوغو، ارمنستان کونستیتوسییاسینین دییشدیریلمه‌سی مقصدیله رفراندومون کئچیریلمه‌سی و «ترامپ یولو» باره‌ده هئچ نه دئمه‌ییب، عکسینه «آرتساخ‌دا ائتنیک تمیزلمه حیاتا کئچیریلیب» ادعاسینی سسلندریب. پاشینیان حاقلی‌دیر. ساموئل کاراپتیان کیمی بیریسینین حاکمیته گلیشی صلح قوروجولوغونا و بؤلگه اؤلکه‌لری آراسین‌دا امکداشلیق اوچون یاخشی هئچ نه وعد ائتمیر. ارمنستان‌دا سئچکی کامپانیاسی بو اؤلکه‌نین داخلی ایشی اولسا دا، فکریمجه، آذربایجان خاریجی ایشلر ناظیرلیینین ارمنستان‌دا مخالفتدن اولان نامزدلرین تخریباتچی آچیقلامالارینا رئاکسییا وئرمه‌سینه احتیاج وار. مثلاً بیان ائدیلمه‌لیدیر کی، ارمنستان‌دا سئچکیدن سونرا فورمالاشان حکومت صلح قوروجولوغوندان و اولکی راضیلاشمالاردان امتنا ائدرسه، بونون هم ایکی اؤلکه آراسین‌داکی مناسبتلره منفی تأثیرلری اولاجاق، هم ده بؤلگه‌ده یئنی محاربه ریسکی یاراداجاق. بو بیانات اونا گؤره اهمیتلیدیر کی، ارمنستان وطنداشلاری سئچکیده دوغرو سئچیم ائتسینلر»، - پولیتولوق وورغولاییب.

قید ائدک کی، ارمنستان‌دا پارلامنت سئچکیلری ایونون ۷-ده کئچیریله‌جک.