تورکیه خارجی ایشلر ناظیرلیی یونانیستانین شاگرد سایینین آزلیغینی بهانه ائد‌رک غربی فراکیا تورک آزلیغینا مخصوص داها ۸ ابتدائی مکتبی باغلاماق قرارینی کسکین شکلده قیناییب.

Axar.az خبر وئریر کی، بو باره‌ده تورکیه خارجی ایشلر ناظیرلیینین سؤزچوسو اؤنجو کئچلی آچیقلاما وئریب.

او بیلدیریب کی، بو سون قرارلا رگیوندا تورک آزلیغینا مخصوص ابتدائی مکتبلرین سایی ۷۶-یا ائنیب.

ناظیرلیک رسمی‌سینین سؤزلرینه گؤره، تکجه مکتبلرین باغلانماسی دئییل، همچنین ایسکئچه ۱ سایلی تورک آزلیق ابتدائی مکتبینین بیرینجی صینفینه قبول زمانی صونعی مانعه‌لرین یارادیلماسی دا بو سیاستین ترکیب حصه‌سیدیر. اؤنجو کئچلی وورغولاییب کی، بو آددیملار غربی فراکیا تورکلرینین تحصیل حقوقلارینین سیستملی شکلده محدودلاشدیریلماسینین نوبتی ثبوتودور.

"بو تضییق کاراکترلی قرارلار و تطبیقلر لوزانا صلح مقاوله‌سینین مدعالارینی آچیق شکلده پوزور. غربی فراکیا تورک آزلیغی ایله باغلی حقوق پوزونتولارینی معین ائد‌ن بین‌الخالق محکمه قرارلارینی و آپاریجی آوروپا اینستیتوتلارینین توصیه‌لرینی اجرا ائتمکدن یایینان یونانیستانی بیر داها آزلیقلارین حقوقلاری و اساس انسان حقوقلاری ساحه‌سینده اوزرینه گؤتوردویو بین‌الخالق عهده‌لیکلره اویغون حرکت ائتمه‌یه چاغیریریق»، - دئیه تورکیه خارجی ایشلر ناظیرلیی سؤزچوسو بیلدیریب.

قید ائدیلیب کی، تورکیه غربی فراکیا تورک آزلیغینین حقوق و منافعلرینین مدافعه‌سی اوغروندا آپاردیغی مبارزه‌نی قطعیتله دستکله‌مه‌یه داوام ائد‌جکدیر.