گونئی آذربایجانین تیکانتپه (تکاب) شهرین‌ده والیدینلرینین «اونور» آدی وئردیی اوشاغا اوچ ایلدیر کی، شخصیت وثیقه‌سی وئریلمیر.

بو باره‌ده ۲۰۱۷-جی ایل تولدلو اوشاغین آتاسی اؤز اینستاگرام صحیفه‌سین‌ده معلومات یاییب. علی هیدایتی تیکانتپه قیدیات ایداره‌سین‌دن محکمه‌یه شیکایت ائتدیینی بیلدیریب.

محکمه‌یه تقدیم اولونان شیکایت عریضه‌سین‌ده «اونور» آدینین ایران‌دا رسمی لیسنزییا ایله چاپ اولونان «گؤزل تورکو آدلاری» و «تورک آدلار سؤزلویو» کیتابلارین‌دا اولدوغو وورغولانیر. هر ایکی کیتاب‌دا «اونور» آدینین گوجلو، حیثیتلی و شخصیتلی معنالارینی داشیدیغی بیلدیریلیر.

علی هیدایتی محکمه‌یه عنوانلادیغی عریضه‌ده تیکانتپه قیدیات ایداره‌سینین بوتون مراجعتلره و طلب اولونان سندلرین تقدیم اولونماسینا باخمایاراق مسئله‌یه لاقید یاناشاراق شخصیت وثیقه‌سینی وئرمک‌دن ایمتینا ائتدیینی یازیب.

او علاوه ائدیب کی، بو مسئله اؤولادینی بیر چوخ حقوقون‌دان، او جمله‌دن، طبی سیغورتا خیدمتی و دؤولت طرفین‌دن نظرده توتولان سوبسیدییالاردان محروم ائد‌رک اونون وطنداش‌لیق حاقلارینین پوزولماسینا سبب اولوب.

اونورون آتاسی محکمه‌دن شخصیت وثیقه‌سینین وئریلمه‌سی و والیدینلرین آد سئچمک حقوقو باره‌ده مؤوجود قانونلاری نظره آلاراق سندین تقدیم اولونماسی اوچون مووافیق قرار چیخارماسینی طلب ائدیب.

تیکانتپه قیدیات ایداره‌سینین مسئوللاری «اونور» آدینین ایداره‌یه اعلان اولونان سیاهی‌دا اولمادیغینی اساس گتیره‌رک اوشاغا شخصیت وثیقه‌سی وئرمک‌دن ایمتینا ائدیرلر. اونلار وثیقه‌نین وئریلمه‌سی اوچون تهران‌دان اجازه طلب اولوندوغونو بیلدیریبلر. ایران‌دا یالنیز حکومت طرفین‌دن قیدیات شعبه‌لرینه اعلان اولونان سیاهی‌دا یئر آلان آدلارا شخصیت وثیقه‌سی وئریلیر. بو سیاهی‌دا تورک آدلارینین بؤیوک اکثریتی یئر آلماییب.