آنا صحیفه پلانت |
مسعود پزشکیان و سعید جلیلی آراسیندا اؤتن گون سونونجو دئباتین شاهدی اولدوق. ماهیتجه، بوندان اولکی مذاکیرهلرله عینی ایدیلر: عنعنوی اولاراق نامزدلر بیر-بیرینی گناهلاندیریر، یارانمیش مختلیف بحرانلارین مسئولیتینی قارشی طرفه آتماغا چالیشیردیلار. همچینین هر ایکی نامزد دیگرینین پلانسیز اولدوغونو ادعا ائدیردی.
گؤرونوشه گؤره، اؤلکهنین موجود پروبلملرینین حلی ساحهسینده کونکرت پلانلاری اولمایان نامزدلر هئچ بیر بحرانی کؤکلو شکیلده حل ائتمهیه قادر دئییل.
شعار و وعدلرله چیخیش ائتمک، خالقین ائشیتمک ایستدیی سؤزلری دیله گتیرمک هئچ زمان یئترلی اولماییب. اساس مسئله بونلاری نئجه گئرچکلشدیرمکدیر. بس، بو نامیزدلر، اساساً ده پزشکیان بو ساحهدهکی پلانلاریندان بحث ائتدیمی؟!
جلیلینین موقعی بللیدیر - ظنیمجه، هئچ کیم اونون هر هانسی بیر پلان اورتایا آتاجاغینی گؤزلهمیردی. لاکین قارشی طرفی اتهام ائدن پزشکیاندان شفاف اولماسی و آیدین شکیلده اؤز پلانینی آچیقلاماسی بیر چوخلاری طرفیندن گؤزلنیلیردی.
بئله حساب ائدیرهم کی، موجود سیاسی و اقتصادی بحرانلاردان خلاص اولماق ایستهنیلهن نامزدین صلاحیتیندن کناردیر. اؤزللیکله، کونکرت پلانین اولماماسی بو ادعانی گوجلندیریر.
ایندی سادهجه اوتوروب جمعه گونو کئچیریلهجک سئچکیلرین نتیجهلرینی گؤزلهمک لازیمدیر. چوخ گمان کی، حاکمیتین مداخیلهسی اولماسا، سئچکیلرین غالیبی مسعود پزشکیان اولاجاق. لاکین سعید جلیلینین غالیب اعلان ائدیلمهسی احتمالی دا موجوددور. بو حالدا پزشکیانا سس وئرنلر آراسیندا - مقیاسیندان آسیلی اولمایاراق - اعتراض سسلری یوکسهلهجک. بس، رژیم بئله بیر وضعیتده بو ریسکی گؤزه آلماغا حاضردیرمی؟!
تاریخ
2024.07.03 / 14:11
|
مولف
آیدین آراز
|