اسمارتفونلاردان توتموش تلویزورا قدر اکران قارشی‌سیندا حدیندن آرتیق واخت کئچیرمک اوشاق و یئنی‌یئتمه‌لرین اورک-دامار ساغلام‌لیغینا جدی تأثیر گؤستره بیلر.

Axar.az خبر وئریر کی، بو باره‌ده آمریکا اورک آسوسیاسییاسینین ژورنالین‌دا قید اولونوب. آراشدیرمانی دانیمارکالی تدقیقات‌چیلار آپاریب.

مین‌دن چوخ اشتراکچینین تحلیلی گؤستریب کی، اکران واختینین هر علاوه ساعتی کاردیومتابولیک ریسکی - یوکسک قان تضییقی، اینسولین مقاومتی و کلسترول پروبلملرینین انکشاف احتمالینی اهمیتلی درجه‌ده آرتیریر. بئله کی، ۱۰ یاشلی اوشاقلار اوچون هر ساعت ریسک ایندکسینه ۰،۰۸ استاندارت اییلمه (معلومات بازاسین‌داکی اؤلچولرین مرکزدن نه قدر کنارلاشدیغینا دایر استاتیستیک گؤستریجی‌دیر) علاوه ائدیب، ۱۸ یاشلیلار اوچون بو گؤستریجی ۰،۱۳ اولوب. بو ایسه او دئمکدیر کی، گونون بئش-آلتی ساعتینی "اکرانا باغلایانلار"دا بو ریسک ۴۰-۶۰ فایز آرتا بیلر.

بیلدیریلیر کی، بو وردیش یوخویا دا خصوصی تهلوکه بخش ائدیر. قید اولونور کی، ۱۰ یاشلی اوشاقلار آراسین‌دا اکران واختی ایله ریسک آراسین‌داکی علاقه‌نین تخمیناً ۱۲ فایزی یوخوسوزلوقلا ایضاح ائدیلیب.

بوندان علاوه، تدقیقات‌چیلار یئنی‌یئتمه‌لرین قانین‌دا گله‌جک اورک-دامار پروبلملرینین ائرکه‌ن بیومارکری اولا بیله‌جک اکران فعالیتی ایله علاقه‌لی اونیکال "متابولیک بارماق ایزینی" معین ائدیبلر.

عالملر وورغولاییرلار کی، اوشاقلیق‌دا فورمالاشان وردیشلر اون‌ایللیکلر عرضینده ساغلاملیغا تأثیر ائده بیلر. بونا گؤره ده، اکران واختینی محدودلاشدیرماق و یوخو جدولینی ساخلاماق پروفیلاکتیکانین ترکیب حصه‌سی اولمالی‌دیر.