یانوارین ۲۰-ده داووس‌دا آذربایجان رسپوبلیکاسینین پرزیدنتی ایلهام علیئو دنیانین آپاریجی گلوبال مالییه اینستیتوتلاریندان بیری اولان آمریکا بیرلشمیش اشتاتلارینین «ژ.پ. مورگان» شیرکتینین صدری و باش اجراچی دیرکتورو جیمی دایمون ایله گؤروشوب.

Axar.az خبر وئریر کی، دولتیمیزین باشچیسی آذربایجان رسپوبلیکاسی دولت نفت فوندو و اؤلکه‌میزین دیگر قوروملاری ایله «ژ.پ. مورگان» آراسیندا موجود امکداشلیق علاقه‌لرینین اهمیتینه توخوناراق، بونون اوزون مددت‌لی کاراکتر داشیدیغینی و قارشیلیقلی اعتمادا اساسلاندیغینی وورغولادی.

آذربایجانین بین‌الخالق مالییه بازارلاریندا اعتبارلی طرفداش کیمی موقعیینی یوکسک قیمتلندیره‌ن جیمی دایمون اؤلکه‌میزده ثابت اینوستیسییا محیطینین اولدوغونو دئدی. او، همچینین آذربایجانین آردیجیل مالییه سیاستی حیاتا کئچیردیینی قید ائتدی. جیمی دایمون رهبرلیک ائتدیی شیرکتین دولت نفت فوندو ایله اوزون مددتلی امکداشلیغا خصوصی اهمیت وئردیینی، بو طرفداشلیغین محکم اینستیتوسیونال اساسلارا سؤیکه‌ندیینی و اونون داها دا درینلشدیریلمه‌سینده ماراق‌لی اولدوقلارینی بیلدیردی.

گؤروشده گلوبال مالییه بازارلاریندا موجود وضعیت، بین‌الخالق اینوئستیسییا محیطی و ماکرواقتصادی چاغیریشلار اطرافیندا فیکیر مبادیله‌سی آپاریلدی، گلوبال اقتصادی پروسسلر فونوندا اینستیتوسیونال اینوئستورلار اوچون فورمالاشان امکانلار و اوزون مددتلی امکداشلیق پرسپکتیولری مذاکیره اولوندو.

قید ائدک کی، اداره ائتدیی آکتیولرین حجمی ۴ تریلیون آمریکا دوللاریندان چوخ اولان «ژ.پ. مورگان» شرکتی بانکچیلیق، اینوئستیسییا و آکتیولرین اداره اولونماسی ساحه‌لرینده فعالیت گؤستریر. تاریخی ۲۰۰ ایلده‌ن آرتیق دؤورو احاطه ائد‌ن شرکت حاضردا دنیانین ان بؤیوک و شاخه‌لندیریلمیش مالییه اینستیتوتلاری سیراسیندا یئر آلیر.