آذربایجان و تورکیه قارداشلیغی گونده‌لیک پروسسلرین چرچیوه‌سینه سیغدیریلمایاجاق قدر کؤکلو، سیاسی و دیپلماتیک مسئله‌لرین فوقونده تاریخی ماهیت داشییاجاق قدر دریندیر. قارداشلیغیمیز ایکی ملتین اراده‌سی ایله گوجلنمیش، اورتاق مبارزه‌لرله محکملنمیش و نسللر بویو یاشادیلمیشدیر.

Axar.az خبر وئریر کی، بو باره‌ده ملیتچی حرکات پارتییاسینین (م.ح.پ) صدری دولت باخچالینین تورکیه جمهوریتینین ۱۰۳-جو، تورک رسپوبلیکالارینین مستقللیینین ۳۵-جی ایلدؤنومو و تورک دولتلری تشکیلاتینین آنکارا زیروه‌سی مناسبتیله یایدیغی یازیلی آچیقلاماسیندا بیلدیریلیب.

باخچالی قید ائدیب کی، عینی حساسلیق تورک دنیاسینین بوتون قارداش دولتلرینه ده عاییددیر:

«هئچ بیر فکر آیریلیغینین آرتماسینا یول وئریلمه‌مه‌لیدیر، هئچ بیر مناقشه دائمی آیریلیغا چئوریلمه‌مه‌لی و آرامیزدا هئچ بیر نیفاق توخومو سپیلمه‌مه‌لیدیر.

قارداشلیق باغلاری قارشی‌لیقلی حرمت و اورتاق گله‌جه‌یه ایناملا قورونور.

بونا گؤره ده تورک دنیاسینین هر بیر عضوونون وظیفه‌سی تاریخی یاخینلیغیمیزی گونده‌لیک مباحثه‌لردن اوستون توتماق، فرقلی‌لیکلری آیریلیق سببلرینه چئویرمکدن چکینمک و گلجییمیزی ضعیفله‌ده‌جک آددیملاردان چکینمکدیر.

اونوتماق اولماز کی، تورک دنیاسینین گوجو بیر-بیریمیزه اولان اعتباریمیزدا، مستقللییمیزه گؤستردییمیز حرمتده، مدنی درینلییمیزده و اورتاق مقصدلریمیز اطرافین‌دا نماییش ائتدیردییمیز اراده‌ده‌دیر».