داغلیق قاراباغدا قارشیدورما و گرگینلیین آرتماسی نه بؤلگه خالقلارینین، نه ده بیزیم خیریمیزه‌دیر.

بونو ایران خاریجی ایشلر ناظیرلیینین سؤزچوسو بهرام قاسمی کئچیردیی مطبوعات کنفرانسیندا آپا-نین ۲ یاشلی زهرانین ارمنیلرین آتشی نتیجه‌سینده قتله یئتیریلمه‌سی ایله باغلی سوالینا جاوابیندا دئییب.

ب. قاسمی خاطیرلادیب کی، ایران بو بؤلگه‌یه ان یاخین اؤلکه‌دیر: «۹۰-جی ایللرده سوویت اتفاقی داغیلدیقدان سونرا، قاراباغدا گرگینلیین باشلاندیغی ایلک گونلرده، ایران واسطه‌چی کیمی چیخیش ائتدی و بیر نئچه آی بؤلگه‌ده ثابیتلیین یارانماسینا چالیشدی. بو گون گرگینلیین آرتماسی و قارشیدورمالارین باش وئرمه‌سی نه آذربایجانین، نه ده ارمنیستانین خیرینه‌دیر. تأسفلر اولسون کی، اجنبی عنصورلر معین واختلار بؤلگه‌ده گرگینلیگی آرتیرماغا چالیشیر و ایختیلافلاری درینلشدیرمه‌یه یاردیم ائدیرلر. سون باش وئره‌ن حادثه‌لره گؤره تأسفلنیریک و اومید ائدیریک کی، بؤلگه‌ده گرگینلیین آزالماسینا و ثابیتلیین تعمین ائدیلمه‌سینه شاهید اولاجاغیق. بیز ده بونون اوچون چالیشاجاغیق».

ب. قاسمی اومید ائتدیینی بیلدیریب کی، مینسک قروپو اؤز عهدلیینی داها جدی شکیلده یئرینه یئتیره‌جک: «تأسفلر اولسون کی، سون قارشیدورمالار زامانی ایکی یاشلی اوشاق و دیگر دینج ساکین اؤلدورولدو. بو، چوخ آغریلیدیر. ایرانین آذربایجانداکی سفیرلیگی بو حادثه ایله باغلی اؤلکه‌میزین مؤوقعینی اعلان ائدیب. بیزیم مؤوقعیمیز آیدیندیر. بیز گرگینلیگی آرتیراجاق هر هانسی آددیما قارشیییق. اومید ائدیریک کی، توصیه‌لریمیزه عمل اولوناجاق. اگر گرگینلیین آزالماسی اوچون نسه ائده بیلریکسه، بیز البته کی، بونو ائتمه‌یه حاضیریق».