ایران پرزیدنتی مسعود پزشکیان تبریزین میللت وکیلی اولدوغو دؤورده و اوندان سونرا پرزیدنت سئچکیلری اؤنجه‌سی تبلیغات و تشویقات کامپانییاسی زامانی دفعه‌لرله غرب اؤلکه‌لری، او جمله‌دن آمریکا ایله دانیشیقلارین طرفداری اولدوغونو دئییب.

او، همین چیخیشلاریندا اؤلکه‌نین پروبلئملرینین چوخونون تهرانین یانلیش بین‌الخالق سیاستلری نتیجه‌سینده تطبیق ائدیلن سانکسییالاردان ایری گلدیینی بیان ائدیب.

پرزیدنت همین پروبلئملرین حلی، ایرانین دونیا اؤلکه‌لری ایله مناسیبتلرینین نورماللاشماسینین غرب، او جمله‌دن آمریکا ایله دانیشیقلاردا اولدوغونو وورغولاییب.

مسعود پزشکیانین بو چیخیش و تکلیفلری محافظه‌کار سیاسی قانادین، خصوصیله سپاه کوماندیرلرینین سرت رئاکسییاسی ایله قارشیلاشیب.

اونلار آمریکا و غربله دانیشیقلار طرفدارلارینی اراده‌سیزلیک‌ده و تسلیم‌چیلیک‌ده گناهلاندیرب، اسلام انقلابینین دیرلرینه خیات‌ده اتهام ائدیبلر.

اؤلکه رهبری علی خامنه‌ای ایسه هر زامان اولدوغو کیمی هر ایکی سیاسی جریانین قارشیدورماسیندان استفاده ائتمه‌یه چالیشیب، ایکیباشلی چیخیشلاری ایله کونکرئت مؤقع بیلدیرمکدن یایینیب.

او، وضعیتین آغیرلیغینی حس ائتدیی و تضییقلری یوماشالتماق مقصدیله بوندان اول ده بیر نئچه دفعه دئدیی کیمی "دوشمنلر قارشی‌سیندا تاکتیکی گئری اوتورمالار و اونلارین قارشیسیندا مصلحته اویغون ائلاستیک‌لیک (نرمش) گؤسترمه‌نین" ممکن اولدوغونو دئییب.

علی خامنه‌اینین بو توصیه‌سینه باخمایاراق، سپاه کوماندیرلرینین مسعود پزشکیانین غربله دانیشیقلار تکلیفینه سرت رئاکسییالارینین داوام ائتمه‌سی، حاکمیت داخیلینده ایکی تیره‌لیین موجودلوغونون تظاهرودور.

اؤلکه‌نین بوتون سیاسی و اقتصادی مرکزلرینده هئگومونلوق ائتمه‌یه آلیشان سپاه کوماندیرلری، اونلارین اراده و ایسته‌ییندن قیراق هر هانسی دییشیک‌لیین باش وئرمه‌سینه دؤزمه‌یه‌جکلری باره‌ده بیاناتلارینی آرتیریبلار.

بو قبیلدن اولان بیاناتلاردان بیرینی ده نوبتی دفعه سپاه کوماندیرینین معاوینی ژنرال محمدرضا نقدی سسلندیریب.

او، میللی باریشیغن آمریکا ایله دانیشیقلار آپارماق و اونونلا پروبلئملری حل ائتمکده اولدوغونو دوشونه‌نلری تنقید ائدیب، آمریکایا قارشی یومشاق مناسیبتدن دانیشماغین قبول‌ائدیلمز و ایرنج اولدوغونو سؤیله‌ییب.

نقدی، بو گون ایرانین هر زامانیکیندان داها سرت شکیلده آمریکایا قارشی چیخمالی اولدوغونو بیلدیریب، بونون عکسینی دوشونه‌نلری تسلیم‌چی آدلاندیریب.

خاطیرلاداق کی، مسعود پزشکیان دفعه‌لرله آمریکا و غربله دانیشیقلارین علیهینه اولانلاری "سانکسییا دللاللاری" آدلاندیریب، اونلارین اؤلکه‌یه تطبیق ائدیلن سانکسییالاردان استفاده ائد‌رک بؤیوک مبلغده پول قازاندیقلارینی دئییب.

بونا گؤره ده، سپاه ژنرالی محمدرضا نقدی‌نین آمریکا ایله دانیشیقلار باره‌ده‌کی سرت چیخیشینی مسعود پزشکیانا خبردارلیق مئساژی کیمی دتیرلندیرمک اولار.

نقدی بو گونه کیمی بیر نئچه واجیب مسئله ایله باغلی بیاناتلار سسلندیریب و بونون سونرادان سپاه-ین رسمی موقعی اولدوغو معلوم اولوب.

بونا گؤره ده، اونون سون بیاناتینی دا سپاه-ین مسعود پزشکیانا خبردارلیق مئساژی کیمی دیرلن‌دیرمک اولار.

بو ایسه ایرانین یئنی پرزیدنتینی آمریکا و غربله دانیشیقلاردا، سانکسییالارین یوموشالدیلماسی زمینینده‌کی سعی‌لرینده اوغورلو اولمایاجاغینی و چتین پروسئسله قارشیلاشاجاغینی دئمه‌یه اساس وئریر.

قید ائدک کی، پزشکیانین "سانکسییا دللاللاری" آدلاندیردیغی قوروم و شخصلر، اساساً سپاه و اونون کوماندیرلریدیر.

اونلار آمریکا و غربین تطبیق ائتدیی سانکسییالاردان یایینماق اوچون، قاچاق یاناجاق اخراجی و اؤلکه‌یه مختلیف ماللارین دولایی یوللارلا گتیریلمه‌سی اوچون گئنیش شبکه قوربلار.

ایللیک دؤورییه‌سی اون میلیاردلارلا دوللار اولان قاچاق اخراجات و ادخالاتین بؤیوک حیصه‌سی بیر باشا و یا دولاییسی ایله سپاه کوماندیرلرینین الینده‌دیر و اونلارین بوندان ال چکه‌جکلری رئال گؤرونمور.

همین شبکه‌یه نظارت ائد‌ن اساس شخصلردن بیری ایسه علی خامنه‌اینین اوغلو مجتبی خامنه‌ای‌دیر.