ایستر بیرینجی قاراباغ محاربه‌سی، ایستر ۲۰۲۰-جی ایل وطن محاربه‌سی زمانی بو تورپاق اوچون جانینی وئره‌ن هر بیر شهیدین ایتکیسی بیزیم اوچون آغیردیر. هر دفن مراسمی یالنیز بیر عائله‌نین یوخ، بوتون بیر خالقین ایچین‌ده درین ایز بوراخیر.

کلبجرده ۳۲ ایل اول شهید اولان حربچی مهمان موسی‌یئوین حکایه‌سی بلکه ده ایللرله یادداشلاردان سیلینمه‌یه‌جک.

اؤتن هفته کئچیریلن دفن مراسمین‌ده چیخیش ائد‌ن شهیدین نشان‌لی‌سی سئودا علیئوانین قهر دولو سؤزلری هر کسی پریشان ائتدی.

«مهمانین آتا-آناسی اونون ایتکین دوشمه‌سی خبرینی آلاندان سونرا دؤزه بیلمه‌دیلر، ایکی‌سی ده رحمته گئتدی. آنجاق من بو گونه قدر مهمانین ساغ-سلامت دؤنجیینی گؤزلییردیم. همیشه مهمانین آدینی اوجا توتدوم. قورورلویام، مهمانلا فخر ائدیره‌م. اونون آدینا لایق یاشادیم».

الاهی، ۳۲ ایل بیر انسانین یولونو گؤزله‌مک نه دئمکدیر؟! گونلری، آیلاری، ایللری بیر سوال اطرافیندا یاشاماق: «بلکه بو گون قاپی دؤیولر...». بیر چوخلاری «او، اؤلوب» دئسه ده، سئودا خانیم بیر آن دا اومیدینی اوزمه‌ییب.

بعضاً بیر انسانین گلمیجیینی اوریین‌ده حس ائدیرسن. گؤزلدیین انسانین سسی آرتیق سوسوب، آیاق سسلری زمانین هاراسینداسا ایتیب. اما سن گؤزلییرسن. چونکی بو، آرتیق ساده‌جه بیر انسانی گؤزله‌مک دئییل، آدین ناموس کیمی قورونماسی، سئوگینین شرف کیمی یاشادیلماسیدیر.

دفعه‌لرله همین کادرلاری ایزلدیم. او چیخیش، او سس، او باخیشلار زمانین دایاندیغی، صبرین داشلاشدیغی آندیر. الله انسانی نه قدر صبرلی، دؤزوملو یارادارمیش. دئییرلر، «اومید سون‌دا اؤلور». بعضاً ایسه هئچ اؤلمور. او قادینین امیدینی اؤلدورمه‌یه نه زامان یئتیب، نه ده انسانلار. ایچینده اینه اوجو قدر اولسا دا، او ایشیغی ساخلاییب.

اونون چیخیشی بیر انسانین دئییل، بوتؤو بیر خالقین صبرینی، صداقتینی، قورورونو افاده ائتدی.

بو، تکجه سئوگی حکایه‌سی دئییل. بو، حیات حکایه‌سی خالقین یادداشینا صداقت سالنامه‌سی کیمی حک اولاجاق. بو او دئمک‌دیر کی، تورپاقلاریمیز یالنیز ایگیدلریمیزین قانی ایله دئییل، سئودا خانیم کیمی آرخادا قویدوقلاری صبرلی، محکم و اوریی داغ اولموش انسانلارین سئوگی‌سی ایله ده قورونور.