فارسجا "آب-ائ زیر-ائ کاه" ایفاده‌سینین قارش‌لیغی تورکجه‌ده "یئره باخان آدام"، "سسس‌سیز تییاره"، "دیل‌سیز ایلان"، "دیشی قارنین‌دا آدام"، "ایمام بوزووو"، "سامان آلتین‌دان سو یئری‌دن"، "یئر آلتین‌دان یاسا گئدن" و "اوزده خالا دال‌دا چالا" ایفاده‌لری‌دیر. بونلاردان باشقا، زنگان‌دا ایش‌له‌دیله‌ن "قیمی" و سولدوزدا ایش‌له‌دیله‌ن "خیمی" سؤزلری ده همین آنلامی داشیماق‌دادیر.

قیمی و خیمی (قیمی و خیمی ) ایشلرینی سس‌سیز و ساکیتجه‌سینه یئرینه یئتیره‌ن آداما دئییلیر. اونا گؤره، خفیف و لال ترپنیشه قیمیل‌داماق فئلینی ایشلدیریک. بیر یئره توپلانمیش اینسانلار ایستکلرینی های-کویله دیله گتیرسه‌لر "میدان قایناییر" اما دوداق آلتی و "میزیلتی" ایله دئسه‌لر "مجلیس قیمیلداییر" دئییریک و بو مینواللا سویون و یا پالچیغین ایچین‌ده چابالایان ساکیت قوردلارا "قیمیلداشیرلار" دئسک داها دوغرو اولار.
قیمی، خیمی، قیم، خیم ایسملرین‌دن یارانمیش منسوبیت سیفتی‌دیر. قیم، خیم، کؤک، تمل و ذات دئمک‌دیر. ائوین بونؤوره‌سینی تیکه‌مه‌یه "خیم باسماق" دئییریک. هابئله "فیلان آدامین خیمی خاراب‌دی"، "بو ایش خیمین‌دان ایری‌دیر" کیمی ایفاده‌لر شففاه دیل‌ده ایشلک‌دیر.
قدیم تورکلر، مای‌دان سودون‌دن الده اولونان بیر ایچکییه "قیمیز" دئییبلر. بو سؤز "کومیس" فورماسین‌دا روسجایا و بوتون آوروپا دیللرینه یاییلیب. (اینگیلیسجه-کوومیسس)
اونورغانین (بئل سوموک فقره‌لری) لاپ آشاغی و کؤتوک فقره‌سینه "قیمیج" یا قوموج دئییرلر. او، فقره‌یه آغیرلیق دوشدویو حال‌دا "قوموجوم باتیب" ایفاده‌سینی ایشلدیریک. حیوانلاردا دا قویروغون کؤتوک فقره‌سینه "قوموج" یا "موچوک" دئییلیر. "قیمیج" فقره‌سی قویروغون باشقا فقره‌لرینه نیسبته‌ن تمل حساب اولونور و هرکتی خفیف‌دیر، اویناق دئییل.
"خیمی" و یا "قیمی" آدامین گیزلین مقصدینی آنلاییب اوزونه وورسان، هئچ وئجینه ده آلماز. بئله آنلاردا "هئچ قیمی دا قیمیل‌دامادی" و یاخود دا "قیمی قیمین‌دان قیمیل‌دامادی" ایفاده‌لری ایشلنیلیر.