اردبیل ایالتینین گیریش یوللاری طرفین‌دن ایکی هفته‌دن بیر تمیزلنه‌جک.

آذنیوز. تو خبر وئریر کی، بو باره‌ده اردبیل شهرینین اطراف موحیط ایداره‌سینین باش دیرکتورو محمد خوداپرست معلومات وئریب.

او بیلدیریب کی، کؤنول‌لو وطنداشلار جمعیتینین(آن ج او) امکداش‌لیغی ایله اردبیل ایالتینین بوتون کند و شهرلرینین گیریش یوللاری ایکی هفته‌دن بیر تمیزلنه‌جک.

«کؤنول‌لو اولاراق اطراف موحیطی قوروماق ایسته‌یه‌ن جمعیتلر بو چرچیوه‌ده بلدییه‌لر و کند مسئوللاری ایله ده بیرگه حرکت ائد‌جکلر».

باش دیرکتور ایالت بلدییه‌لرین‌دن توللانتیلارین ایستاندارت شکیل‌ده محو ائدیلمه‌سینی ایسته‌یه‌رک کئچمیش‌ده اولان سهو و ختالارین آرادان قالدیریلماسینین واجیبلیینی بیلدیریب.

قید ائدک کی، اردبیل و گونئی آذربایجانین بوتون شهرلرین‌ده توللانتیلار اطراف موحیط ایستانداردلاری ایله محو ائدیلمیر. بو دوروم طبیعت و دوغایا بیر چوخ زیانلار وورور.

خاطیرلاداق کی، کؤنوللو اطراف موحیط قورویوجولاری قانونی اولاراق هئچ بیر دؤولت اورگانینا باغلی اولمادان عادی وطنداشلاردان تشکیل اولونور.