سرعین‌ده هوتئل کیمی قئیدیات‌دان کئچمه‌ین مکانی هوتئل کیمی ایستیفاده اولونور.

آذنیوز. تی وی ایسنا خبر آگئنتلیینه ایستیناداً خبر وئریر کی، بو باره‌ده سرعین شهر مکتب خئیرییه‌چی‌لیگی تشکیلاتی‌نین صدری مسعود موسی زاده معلومات وئریب.

«۱۹۹۶-جی ایلده شهرده شدت‌لی زلزله باش وئردیک‌دن سونرا مکتبین اوچما تهلوکه‌سی اورتایا چیخاراق بینانین سؤکولوب یئنی‌دن تیکیلمه‌سی ضرورتی یارانیب. سونرا آبش-ین بوستون شهرین‌ده یاشایان بیر نئچه خئیرییه‌چی همین زامانین طلبلرینه اویغون ۳ مرتبه‌لی بیر ایبتیدایی مکتب تیکیب، تحصیل ایداره‌سینه تحویل وئردیلر. همین زامان مکتبین ۱-جی مرتبه‌سین‌ده ۵ صینیف تیکیلدی. اوست قاتلار ایسه سویت فورماسین‌دا تیکیله‌رک تحصیل ایداره‌سینه وئریلدی. بیر مدت سونرا سرعین‌ده توریزم اینکیشاف ائتدییی اوچون مکتب آرتیق هوتئله چئوریلدی و هوتئل اولاراق دا قالدی. ایندی اهالی‌نین سایی آرتیغینا گؤره مکتبه اولدوقجا احتیاج یارانیب، لاکین تحصیل ایداره‌سی‌نین بو حرکتینی گؤردوک‌دن سونرا هئچ بیر خئیرییه‌چی کؤمک‌لیک ائتمیر. مکتبین حیاطی آوتوموبیل پارکی، اؤزو ایسه هوتئل کیمی ایستیفاده اولونور. تحصیل ایداره‌سی بو باره‌ده خالقا جاواب وئرمه‌لی‌دیر، نه اوچون مکتبی هوتئله چئویریب؟ همچینین یای آیلارین‌دا تحصیل ایشچیلری هئچ بیر شرایطی اولمایان یئرلرده، صینیفلرده یئرلشیرلر. بیز عزیز تحصیل ایشچیلرینه داها اوجوز یئرلر آییرماق اوچون حاضیریق لاکین مکتبین هوتئله چئوریلمه‌سی یول وئریلمزدیر»، دئیه، موسی زاده بیلدیریب.

دیگر طرف‌دن شهرین فرمانداری، (ایجرا حاکمیتی‌نین باش‌چی‌سی) مسئله‌یه موناسیبت بیلدیریب.

«مکتب هوتئله چئوریلمه‌ییب. بو، اصلین‌ده، مهمان‌خانا اولوب و تحصیل ایداره‌سینه دئمیشیک کی، بو باره‌ده اهالییه معلومات وئرسین، مسئله‌یه آیدین‌لیق گتیریلسین. مادده ۱۰۰ بونون اوچون لیسئنزییا وئرمه‌لی‌دیر و پروبلئملر قیسا بیر مدت‌ده حل اولونمالی‌دیر».

اردبیل تحصیل باش ایداره‌سی‌نین موعاوینی ایسه مسئله ایله باغلی دانیشارکن مکانین تحصیل – ریفاه مرکزی اولدوغونو و گلن توریستلره خیدمت گؤستردیینی بیلدیریب.

بو پروبلئم‌ده باشقا قورومون الی اولدوغو دئییلیر. بئله کی، مدنی ارث، ال ایشلری و توریزم باش ایداره‌سی غیری-قانونی اولاراق همین یئرین هوتئل کیمی ایستیفاده اولونماسی اوچون ایجازه وئریب. بو ایسه آچیق قانون پوزونتوسودور.

قئید ائدک کی، توریزمین دبه میندیی زامان‌دا شهرین ایجرا باش‌چی‌سی (فرمانداری) گوج‌لو طرف‌ده دایاناراق دئییر، بورا، اصلین‌ده، هوتئل اولوب. او قئید ائدیر کی، هوتئل لیسئنزییاسی وئریلمه‌ییب و دانیشیقلار آپاریلیر، قیسا مدت‌ده وئریله‌جک. اگر هوتئل‌دیرسه، ۹۰-جی ایلده‌ن بری نه اوچون بورا لیسئنزییا وئریلمه‌ییب؟ گؤره‌سه‌ن بیر لیسئنزییانین وئریلمه‌سی اوچون ۳۰ ایله یاخین زامان لازیم‌دیر؟ بوستون‌دان خئیرییه‌چیلر دوروب گلیب سرئیین‌ده خئیرییه هوتئلی تیکیب گئدیب؟