اؤز شهریمیزده، تبریزده ده تورک دیلینده دانیشمامالییق، بو نه اویوندور چیخاریرسینیز؟ من سیاسی فیکیر سؤیله‌مک ایسته‌میرم، آنجاق پروسئس گؤستریر کی، بیزدن سیاسی آجیق آچیرلار.

Axar.az خبر وئریر کی، بو سؤزلری تبریزین آتا هاوا یوللاری شیرکتی‌نین صاحبی محمدرضا زنوزی دئییب.

او، تهران-تبریز اوچوشوندا آتا آویاشیرکتینه مخصوص طیاره‌نین بلدچی‌سینین قوناقلارا تورک دیلینده "خوش گلدینیز" دئمه‌سینین سیاسی‌لشدیریلدیینی و بونون سئپاراتچی‌لیق کیمی قلمه وئریلمه‌سینی تنقید ائدیب.

مسئله‌نین ایران تلویزیونودا دا عکس اولوندوغونو سؤیله‌ین زنوزی، بونون آیری-سئچکیلیک سیاستینه یدمت ائتدیینی سؤیله‌ییب.

"ایران تلویزیونو اؤلکه‌ده یاشایان بوتون خالقلارا مخصوص‌دور، بیز سئپاراتچی دئییلیک، سئپاراتچی سیزلرسینیز کی، بو حرکتلرینیزله سو-استفاده‌لره یول وئریرسینیز"،- او بیلدیریب.

آذربایجانلی ایش آدامی تورک دیلینده بیر جمله‌یه گؤره بو قدر قالماقال یاراتماغین آنلاشیلماز اولدوغونا دقت چکیب، مسئله‌نین شیشیردیلدیینی دئییب.

"سؤزوموزو دئمک ایسته‌دییمیزده سئپاراتچی، پانتورکیزم دامغاسی وورورلار، سئپاراتچی سیز و سیزین اجدادینیزدیر. مگر نه باش وئریب؟ ساده‌جه تاپیشیرمیشیق کی، قوناقلارا فارس و انگیلیس دیللری ایله یاناشی تورک دیلینده ده "خوش گلدینیز" دئییلسین. بونون هاراسی سئپاراتچی‌لیق‌دیر، مگر کونستیتوسییادا غیری-فارس دیللردن استیفاده حقوقو عکس اولونماییب؟"،- زنوزی قئید ائدیب.

قید ائدک کی، تهران‌دان تبریزه اوچان طیاره‌ده بلدچی‌نین سرنیشینلره آذربایجان تورکجه‌سینده "خوش گلیبسینیز" دئمه‌سی فارس میلیتچیلرینین اعتراضلاری ایله قارشیلاشیب و اونلار بونو آتا هاوا یوللاری شیرکتینین سئپاراتچی‌لیغی تبلیغی کیمی تقدیم ائدیبلر.

تانینمیش سوسیال مئدیا فعالی، پانفارسیست سیاسی جریانا منصوب امیر سیدین مسئله ایله باغلی ائتدیی پایلاشیم‌دا قوناقلارا تورک دیلینده "خوش گلیبسینیز" دئییلمه‌سینی اؤلکه قانونلاریننین پوزولماسی کیمی قلمه وئریب.

مسئله‌نین اجتیماعیلشمه‌سیندن سونرا طیاره بلدچی‌سی قوناقلاری تورک دیلینده قارشیلادیغینا گؤره ایشدن قووولوب.