غربی آذربایجان ایالتینین سلماس شهرین‌دن اولان ۴ ملی فعال، غلام حدودی، مرتضی احمدی، ناصر اصلانی و علی میرزالو تهلوکه‌سیزلیک اداره‌سینه چاغیریلاراق دیندیریلیب و تهدید ائدیلیب.

Axar.az خبر وئریر کی، بو باره‌ده انسان حاقلاری فعاللاری معلومات یاییب.

اونلارین حبس‌ده اولان آذربایجان‌لی سیاسی و ملی فعاللارین عائله‌لری ایله گؤروشدوکلرینه گؤره تضییقلره معروض قالدیقلاری بیلدیریلیب.

بونونلا یاناشی تهلوکه‌سیزلیک مأمورلاری حمید عباسی آدلی فعالین ایش یئرینه هجوم ائد‌رک اونو حبس ائدیبلر.

مأمورلار فعالین ایش یئرینده آختاریش آپاریب، اونا مخصوص بعضی اشیالاری، او جمله‌دن کومپیوتر و موبایل تلفنو اؤزلری ایله آپاریبلار.