ایران مئدیاسی و سوسیال مئدیا پلاتفورمالاریندا تانینمیش تبریزلی ایش آدامی و مدنیت خادمی علی وهابزادنین (علی پولاد) اؤلوم خبری یاییلیب.

Axar.az خبر وئریر کی، معلومات اؤلکه‌نین رسمی مئدیاسیندا دا عکس اولونوب.

خبرین یاییلماسیندان قیسا مدت سونرا علی پولاد ویدئو پایلاشاراق باره‌سینده یاییلان معلوماتین دوغرو اولمادیغینی بیلدیریب.

"اؤلدویوم باره‌ده خبرلر منیم اؤزومه ده سورپریز اولدو، گؤرونور منی ایسته‌یه‌نلرین سایی چوخدور. یاخشی اولاردی خبری درج ائتمه‌دن اول بونو دقیقلشدیرسینلر. نه ایسه، هله اؤلممیشه‌م و ۲۰ ایل بوندان سونرادا خالقیمین قوللوغوندا اولاجاغام"،- او، دئییب.

قید ائدک کی، ۱۹۴۴-جی ایلده تبریزده آنادان اولان علی پولاد اهمیت‌لی مدنی فعالیتلری ایله یاناشی، تبریزین اؤلکه سوییه‌سین‌ده تانینان ایش آداملارین‌دان بیریدیر.

تبریزده بیر نئچه اهمیت‌لی اقتصادی موسسه‌نین، تجارت مرکزینین ییه‌سی اولان ایش آدامی، خاریجی سرمایه‌چیلرین شرقی آذربایجان ایالتینه جلب اولونماسین‌دا دا بؤیوک رول اویناییب.

آذربایجان مدنیتی ایله باغلی بیر نئچه کیتابین مؤلفی اولان علی پولاد، هم ده تبریزده آذربایجان دیلی، مدنیتی و اینجه‌صنعتی ایله باغلی اونلارلا تدبیرین تشکیلاتچی‌سی و ایسپونسورو اولوب.

اوزون ایللر تورکیه و آذربایجان رسپوبلیکاسین‌دا یاشایان علی پولاد ۱۹۹۱-جی ایلده آذربایجان اقتصادیاتینا سرمایه قویان ایلک ایش آداملاریندان بیری اولوب.

تورکیه و آذربایجان یازیچیلار بیرلیینین فخری عضوو اولان مدنیت خادمی ۲۰۱۴-جو ایلد تبریزه قاییدیب.