کولت. آذ-این «بیر زامانلار تبریزده...» آدلی لاییحه‌سین‌ده تقدیم ائدیله‌جک نؤوبتی موسیقی «نئیلرسه‌ن؟» آدلانیر.

ماهنینین ایفاچی‌سی عالییه ۱۹۶۰-۷۰-جی ایللرده تبریزین مشهور خواننده‌لریندن بیری اولوب. خواننده حاقیندا دقیق معلوماتلار یوخدور. لاکین او دؤورده اوخودوغو ماهنیلار تبریزده چوخ مشهور اولوب. اونون اساس ماهنی‌سی «آمان منیم تالان جانیم» اولوب. ایندی تقدیم ائدجییمیز «نئیلرسه‌ن؟» ماهنی‌سینین سؤزلری ایسه سوال-جاواب اوزریندن قورولوب. عالییه‌نین دوئت اورتاغینین آدی او دؤورون خوانندلریندن اولان نادیردیر:

سن بیر قانادلی قوش اولسان،
گؤیلره اوچان سن اولسان،
من ده بیر شراره اولسام،
سنی یاندیرسام، نئیلرسن؟!

سن بیر شراره اولسان،
منی یاندیران سن اولسان،
من بیر اوووج داری اولسام،
یئره سپیلسه‌م، نئیلرسن؟!

سن بیر اوووج داری اولسان،
یئره سپیله‌ن سن اولسان،
من ده جوجه‌لی تویوق اولسام،
سنی دنله‌سه‌م، نئیلرسن؟!

سن جوجه‌لی تویوق اولسان،
منی دنله‌یه‌ن سن اولسان،
من بیر بالا جئیران اولسام،
داغلارا قاچ‌سام، نئیلرسن؟!

سن بیر بالا جئیران اولسان،
داغلارا قاچان سن اولسان،
من بیر ماهیر اووچو اولسام،
سنی اوولاسام، نئیلرسن؟!

سن بیر ماهیر اووچو اولسان،
منی اوولایان سن اولسان،
من بیر قیزیل آلما اولسام،
ساندیغا گیرسم، نئیلرسن؟!

سن بیر قیزیل آلما اولسان،
ساندیغا گیرن سن اولسان،
من بیر پاسلی آچار اولسام،
ساندیغی آچسام، نئیلرسن؟!

سن بیر پاسلی آچار اولسان،
ساندیغی آچان سن اولسان،
من بیر بالا گلین اولسام،
ساندیقدان چیخسام، نئیلرسن؟!

سن بیر بالا گلین اولسان،
ساندیق‌دان چیخان سن اولسان،
من بیر گؤزل اوغلان اولسام،
سنی آلسام، نئیلرسن؟!