بورا اؤلکه‌نین مدنیت و کولتور مرکزی اولان تبریزین «شاعرلر مقبره‌سی»دیر. بورادا ۴۰۰ شاعرین، عاریفین مزاری وار.

تاریخ بورادا تورپاغا باسدیریلمیش میستیکلرین آدلاری ایله زنگین‌دیر. آنجاق صلاحیت‌لیلرین لاقیدلیگی نتیجه‌سین‌ده، بورا آرتیق سومسوک ایتلرین یوواسینا چئوریلیب. قبیرلر آراسین‌دا کؤپکلر دولاشیر، هوروشمه‌لری بیر آن کسیلمیر. بورا زیارته گلنلر ایرنج بیر دوروملا اوزلشیرلر.

تبریز تاریخینین ان آجی دؤورون‌ده، قیتلیقدا، زلزله و محاصره واختلارین‌دا بئله بو کیمی آجی و اورک اوزوجو منظره‌نی گؤرمه‌ییب. تبریز شاعرلر توربه‌سینین آدی ۳۰ ایلدیر کی، قازینتی، تورپاق گؤتورمک و آلماتورلارلا برابر یازیلیر. دئمک، توربه میللتیمیز کیمی اؤزگورلوک اوزو گؤرمکدن محروم ائدیلیب.

۲۰۱۳-جو ایلده اؤلکه‌نین «ان بؤیوک مدنیت لاییحه‌سی» کیمی شاعرلر توربه‌سینین اینکیشافی ایله باغلی تبریز بلدییه‌سینه لاییحه وئریلیب. آلتی ایلده‌ن سونرا امین‌لیکله سؤیله‌مک اولار کی، بو مزارلیق لاییحه‌سینین تحویل وئریلمه‌مه‌سینین دؤرد سببی وار:

بیرینجی‌سی، بو لاییحه دؤولت ایدارچیلیین‌دن شهر ایدارچیلیینه کئچدی. بو ایشین دؤولت ایدارچیلیین‌دن اوزاقلاشماسی ایله لاییحه‌نین میللی کردیت خطینه داخیل ائدیلمه‌سینین چتین اولاجاغی بل‌لی ایدی. سون ۶ ایلده اولدوغو کیمی، حکومتین لاییحه‌یه هئچ بیر مالییه یاردی‌می اولمادی.

ایکینجی‌سی، لاییحه‌نین اینشاعات ایشلری تله‌م-تلسیک شهرین داها آز اوستونلوک وئریله‌ن اراضیلرین‌دن بیری اولان ۱۰-جو بلدییه‌یه تحویل وئریلدی. گونلوک خیدمتیلرین‌ده چتینلیک چکه‌ن بلدییه بؤلگه‌سی بو بؤیوکلوک‌ده لاییحه‌نی نئجه بویا-باشا چاتدیراجاغی ایلک باشدان بللی ایدی.

اوچونجوسو، لاییحه پلانینین دیزاینی چوخ ماراق‌لی و ادعالی ایدی. شاعرلر توربه‌سی او قدر مورکب ادعالی اولدو کی، آلتی ایلدیر بو لاییحه‌نین دیب-بوجاغی معینلشمه‌ییب.

دؤردونجوسو، بلدییه ایله آنلاشمادا مدنی ارثین حساس‌لیغی داها دوزگون گؤز اؤنونه آلینمادی. شاعرلر مزاری تاریخی بیر یئرده یئرلش‌سه ده، مدنی ارثین تاریخی ملاحظه‌لره نظارت ائتمک اوچون یئترینجه نظارتی اولماییب.

لیلا حسین نیا شکیللری پایلاشارکه‌ن بیلدیریب:

بو شکیللری اسغار فردینین یاس مراسیمین‌ده چکمیشه‌م. اؤز نؤوبه‌م‌ده بؤیوک حکیم خاقانی شیروانی، اسدی طوسی، قطران تبریزی، حمام تبریزی، جواد آذر، اصغر فردی و بؤیوک شاعریمیز شهریاردان بو فوتولارین یاییملانماسی اوچون عذر ایستییرم.

او، بو شکیللرین یاییملاماق‌دان، تبریز کولتور صلاحیت‌لیلرینین درین یوخودان آییلماغینی آرزو ائدیب.