تورکیه رگیون‌دا گرگینلیین آرادان قالخماسی اوچون سعیلرینی اسیرگه‌میر. آنکارا ایرانین پارچالانماسینا و قونشو اؤلکه‌ده وطنداش محاربه‌سینین آلوولانماسینا یؤنلمیش ایسته‌نیله‌ن پلانا، او جمله‌دن سپاراتیزم و ائتنیک قارشیدورما یارادیلماسیندان استفاده ائدیلمه‌سینه قارشی چیخیر.

Axar.az خبر وئریر کی، بونو تورکیه‌نین خارجی ایشلر ناظیری هاکان فیدان آنکارادا آلمانیانین خارجی ایشلر ناظیری یوهانن وادفول ایله بیرگه کئچیردیی مطبوعات کنفرانسین‌دا سؤیله‌ییب.

تورکیه خارجی ایشلر ناظیرلیی رهبرینین سؤزلرینه گؤره، ایران مسئله‌سی آلمانیالی همکاری ایله آپاریلان دانیشیقلارین اساس موضوع‌لاریندان بیری اولوب.

«ایران‌دا باش وئرنلر کونتکستینده هئچ بیر یانلیش آددیما یول وئریلمه‌سینه امکان وئرمیجه‌ییک. تورکیه محاربه‌نین گئدیشی و اونون نتیجه‌لری ایله باغلی حادثه‌لرین انکشافینین بوتون سناریلرینه حاضردیر»، – دئیه تورکیه‌لی ناظیر وورغولاییب.

فیدان قید ائدیب کی، دنیادا و یاخین شرقده باش وئرن سون حادثه‌لر، متفقلیک علاقه‌لرینین، او جمله‌دن آوروپانین تهلوکه‌سیزلیینین تمل داشی اولان ناتو چرچیوه‌سینده‌کی علاقه‌لرین اهمیتینی بیر داها گؤستریر.

تورکیه دیپلماتییاسینین رهبری آلمانیانین تورکیه‌نین آوروپا اتفاقینا عضولوک پروسسینه تحفه وئرجه‌یینه امید ائتدیینی بیلدیریب.