دنیا مئدیاسین‌دا سون گونلر وئریلن خبرلر اساسین‌دا ائله رای یارانیر کی، سانکی ایران محاربه‌ده داها اوستون شرطلر دیکته ائتمه‌یه باشلاییب. خصوصیله هرمز بوغازینین باغلانماسی و انرژی قیمتلرینین قالخماسیندان سونرا اینفورماسییا آخینین‌دا فرق‌لی تندنسییا مشاهده ائدیلیر. اصلینده ایسه رئال فاکتلار باشقا جوردور.

بو سؤزلری Axar.az-آ آچیقلاماسیندا گونئی‌لی فعال و سیاسی مشاهده‌چی علیرضا زمانی دئییب.

او بیلدیریب کی، محاربه‌نین بیر آیینین نتیجه‌لرینه گؤره ایرانین ایتکیلری حیرت‌آمیزدیر:

«ایرانین عالی دینی رهبری، یوکسک روتبه‌لی حربچیلری، کوماندیرلری اؤلدورولوب. اؤلکه‌ده نفوذلو و مشهور سیمالارین بؤیوک اکثریتی آرتیق آرادان گؤتورولوب.

دیگر طرف‌دن، ایرانین راکت بوراخیلیش قورغولاری قات-قات آزالیب. محاربه‌نین ایلک گونو ایله حاضرکی وضعیتی مقایسه ائتسک، گؤرریک کی، ایران آرتیق نوبتی هجوم دالغاسینی اعلان ائدرکن، بیر نئچه راکت آتا بیلیر. محاربه‌نین ایلک گونلرینده عرب اؤلکه‌لرینه و اسرائیله ۱۵۰-۱۶۰ راکت گؤندریردی، ایندی بو هجوم ۸۰-۹۰% آزالیب.

بوندان علاوه، ایران‌دا هر گون یوزلرله هدف وورولور. بونلار تکجه حربی اوبیکتلر دئییل، هم ده حیاتی اهمیت داشییان اینفراستروکتورلاردیر».
اکسپرت حساب ائدیر کی، ایرانین «دشمن» آدلاندیردیغی اؤلکه‌لرده ووردوقلاری و آمریکا و اسرائیلین ایران‌دا ائتدیکلری مقایسه ائدیلمه‌یه‌جک قدر فرقلی‌دیر:

«نتیجه‌لر گؤستریر کی، ایران حقیقتا چتین وضعیت‌ده‌دیر. محاربه‌دن چیخماغا چالیشیر، اما آمریکا و اسرائیل محاربه‌نی سونا چاتدیرماغا تلسمیرلر. احتمال وار کی، بو گونلرده قورو عملیاتی باشلاسین. آرتیق خارک آداسینین اشغالی نظردن کئچیریلیر.

محاربه‌نین نتیجه‌سی نه اولاجاق، بیلمیرم، اما گؤرونه‌ن اودور کی، ایران آغیر ایتکیلر وئریب و بو ایتکیلرین برپاسی، هله محاربه بو گون دایانسا، ۳۰-۴۰ ایل چکه‌جک».

علیرضا زمانی وورغولاییب کی، ایران جمعیتینین حاکمیتین اطرافین‌دا بیرلشدیی حاق‌دا ادعالار دا دوغرو دئییل:

«من گونئی‌لی کیمی دئییرم کی، بو ادعالار حقیقتی عکس ائتدیرمیر. عکسینه، جمعیت محاربه‌نین سببینی ائله ایران رژیمینین اؤزونده گؤرور».