تورکیه‌ده فاکتیکی اولاراق حاکمیتده اولان آ.ک.پ-نین دینه مناسبتی مثبتدیر و دینی ایدئولوگییانین یاییلماسیندا، دین واسطه‌سیله حاکمیتین آیاقدا قالماسیندا ماراقلی‌دیر. بو، نه تورکلویون، نه ده عثمانلی اداره‌چیلیک عنعنه‌لرینین عمومی دولتچی‌لیک پرینسیپلری ایله اویغون گلیر. یعنی، بونلار بیر-بیرینی تمامیله انکار ائد‌ن مسئله‌لردیر.

بو سؤزلری Axar.az-آ آچیقلاماسیندا تحصیل اکسپرتی ائلچین افندی دئییب.

اونون سؤزلرینه گؤره، حاضردا تورکیه‌ده کونکرت اولاراق دینی اساسلی تدریسین حیاتا کئچیریلمه‌سی، تریقت کورسلارینین یارادیلماسی، مختلف کورسلارا – اسماعیل‌آغا، سلیمانچیلار، منزیل و س. سربستلیک وئریلمه‌سی مشاهده اولونور.

«بورادا مختلف طریقتلره جلب اولونانلارا ایمکان وئریلیر کی، اؤز دینی بیلیکلرینی فورمالاش‌دیرسینلار، مختلف دینی طریقتلر چرچیوه‌سین‌ده فعالیت گؤسترسینلر و اؤز چئوره‌لرینی یاراتسینلار. بو دا، البته کی، تورکیه‌نین اؤزو اوچون جدی تهدیددیر.

بو تهلوکه معین مدتدن سونرا تورکیه‌ده چوخ بؤیوک قارشیدورمایا گتیریب چیخاراجاق. گؤرونه‌ن اودور کی، تورکیه حاکمیتی بو مسئله‌نین ماهیتینی او قدر ده درک ائتمیر و یا تهلوکه‌نین نه قدر درین اولدوغونون فرقینده دئییل. اما تورکیه‌ده‌کی ملیتچی حرکت پارتییاسی (م.ح.پ) و دولت باخچالی، ائلجه ده اونون تفکورونو بؤلوشه‌نلر بو گئدیشاتین گله‌جکده بؤیوک تهلوکه یاراداجاغینین فرقینددیرلر»، - او بیلدیریب.

اکسپرت حساب ائدیر کی، تورکیه‌نین گئج اولمادان بو یولدان دؤنمه‌سی داها مقصده اویغوندور:

«عکس حالدا، تورکیه اؤزونو تهلوکه قارشی‌سیندا قویا بیلر. عینی زمان‌دا، بو قدر شخصین تورکیه‌نی، دئمک اولار کی، دینی رادیکالیزم استقامتینه یؤنله‌ندیرمه‌سی نتیجه‌سینده اؤلکه‌ده حتی ایرانداکیندان دا، افغانیستانداکیندان دا داها سرت شریعت قایدالارینا اساسلانان بیر دولت قورولوشو فورمالاشا بیلر. بو ایسه تورکیه و دیگر تورک دولتلری اوچون هئچ ده یاخشی وضعیت دئمک دئییل.

اونا گؤره ده، حساب ائدیرم کی، تورکیه دولتی بو مسئله‌ده دقتلی اولمالیدیر. دنیادان تجرید اولونماق، دنیوی تحصیلدن اوزاقلاشماق، رسمی و علمی پروسسلردن کنارلاشاراق کونکرت اولاراق دینی، رادیکال و موافق طریقتلره یؤنلمک تورکیه اوچون هئچ ده اوغورلو گله‌جک وعد ائتمیر».